Petropavldaǵy lombardtan iri kólemdegi altyn buıymdar urlandy — uıym basshylyǵy qylmysty ashýdǵa kómekteskenderge syıaqy tóleıtinin jarıalady, dep habarlaıdy infohub.kz saıty.
Urlyq týraly habarlama lombardtyń Instagram paraqshasynda jarıalandy. Jarıalanymdaǵy derekterge súıensek, 2026 jylǵy 15-16 tamyzǵa qaraǵan túni Petropavl qalasyndaǵy jaýapkershiligi shekteýli seriktestiktiń bir bólimshesine belgisiz adam qulypty buzyp kirip, iri kólemdegi altyn buıymdardy urlap ketken.
«Eger bireý osy múlikti urlaý faktisi týraly naqty biletin bolsa, qylmysty ashýǵa kómektesýlerińizdi suraımyz. Aqparattyń qupıalylyǵyna kepildik beremiz jáne laıyqty syıaqy tóleımiz», — delingen habarlamada.
NUR.KZ tilshisine Soltústik Qazaqstan oblysy polısıa departamentinde habarlaǵandaı, Petropavldaǵy lombardtan jasalǵan urlyq faktisi boıynsha sotqa deıingi tergeý júrgizilýde.
«Oqıǵa orny qaralyp, zattaı dáleldemeler alyndy, beınebaqylaý kameralarynyń jazbalary zerttelýde, uıym qyzmetkerleri men kýágerler jaýapqa tartyldy. Urlyqqa qatysy bar adamdy jáne urlanǵan múliktiń ornalasqan jerin anyqtaý úshin qajetti tergeý jáne jedel-izdestirý sharalary júrgizilýde», — dep naqtylady polısıada.
Vedomstvo ókilderi Qylmystyq is júrgizý kodeksiniń 201-babyna sáıkes ózge málimetter jarıa etýge jatpaıtynyn atap ótti.