Soltústik Qazaqstan oblysynda qatty turmystyq qaldyqtar polıgonynyń arǵy jaǵynda, Shahovskoe aýylynyń mańynda qýraı órtendi. Aldyn ala málimetterge qaraǵanda, órt shamamen 6 gektar aýmaqty sharpyǵan. Bul týraly oblystyq Tótenshe jaǵdaılar departamenti habarlady, dep jazady infohub.kz saıty.
Bir ýchaskede órt sóndirýshiler jalyndy aýyzdyqtap úlgerdi. Taǵy eki ýchaskede sóndirý jumystary jalǵasyp jatyr.
Órtti sóndirýge Soltústik Qazaqstan oblysy TJD-nyń 110 qyzmetkeri men 31 tehnıka birligi jumyldyryldy. Oqıǵa ornynda jedel shtab qurylyp, tórt jaýyngerlik ýchaske ashyldy.
Sonymen qatar sóndirýge temirjol kásipornynyń órt poıyzy tartyldy.
TJD ókilderi órttiń taralýyna qatty jel yqpal etip otyrǵanyn atap ótti. Negizgi kúsh órtti tejeýge jáne jaqyn mańdaǵy eldi mekender men nysandardy qorǵaýǵa baǵyttalǵan.
HALYQSTAN Telegram-arnasynyń dereginshe, órtten shyqqan qoıý tútin Petropavlǵa jetken, turǵyndar kúıik ıisine jáne kórinýdiń nasharlaýyna shaǵymdanyp otyr.
Ahýal Soltústik Qazaqstan oblysy TJD-nyń baqylaýynda.
Buǵan deıin «Kýrsıv» Almaty oblysynda Uzynaǵash aýylynyń mańyndaǵy jumys istep turǵan qatty turmystyq qaldyqtar polıgonyndaǵy órttiń aýyzdyqtalǵanyn jazǵan bolatyn. Jalyn 500 sharshy metr aýmaqqa taralyp, sóndirýge 33 adam men 22 tehnıka birligi jumyldyrylǵan.