Petropavlda mamandandyrylǵan aýdanaralyq ákimshilik sot Qytaıda ótken gır sportynan álem chempıonatynda úshinshi oryn alǵan sportshynyń jattyqtyrýshysyna aqshalaı syıaqy tóleýden bas tartýdy zańsyz dep tanydy, dep habarlaıdy infohub.kz saıty.
Soltústik Qazaqstan oblysy sottarynyń resmı Telegram-arnasynda habarlanǵandaı, sot gır sporty jattyqtyrýshysynyń Qazaqstan Respýblıkasy Týrızm jáne sport mınıstrligine jáne Qazaqstan Respýblıkasy Týrızm jáne sport mınıstrliginiń Sport jáne dene shynyqtyrý isteri komıtetine qarsy talap aryzy boıynsha ákimshilik isti qarady.
Daý 2025 jyly Haının qalasynda (Qytaı) ótken gır sportynan álem chempıonatynda úshinshi oryn alǵan sportshynyń jeke jattyqtyrýshysy retinde aqshalaı syıaqy tóleýden bas tartýǵa baılanysty týyndady.
Bastapqyda jattyqtyrýshyǵa birinshi jattyqtyrýshy retinde aqshalaı syıaqy tólengen, alaıda oǵan jeke jattyqtyrýshy retinde tóleýden bas tartyldy. Bul sheshimmen kelispegen ol Qazaqstan Respýblıkasy Týrızm jáne sport mınıstrligine shaǵym berdi. Shaǵymdy qaraý qorytyndysy boıynsha mınıstrlik te tóleýden bas tartty.
Osydan keıin jattyqtyrýshy sotqa júgindi.
Sot talap qoıýshy sportshyny 2022 jyldan bastap daıyndaǵanyn anyqtady. Bul mán-jaılar sport mektebiniń buıryqtarymen, sabaqtardy esepke alý jýrnaldarymen, sport mektebiniń jaýabymen, sondaı-aq sportshyny daıyndaýdyń jeke josparymen rastaldy.
Sot zańnamada jattyqtyrýshyny jeke dep taný úshin krıterı retinde sportshyny keminde úsh jyl daıyndaý kezeńi belgilengenin atap ótti. Bul rette sportshynyń ulttyq qurama quramynda bolmaýy, sondaı-aq Erejelerde kózdelgen qujattar quramynda jeke jospardyń usynylmaýy tóleýden bas tartýǵa negiz bola almaıdy.
Sonymen qatar sot ótinish pen shaǵymdy qaraý kezinde ákimshilik rásim tártibiniń buzylǵanyn, onyń ishinde is mán-jaılarynyń tıisinshe zerttelmeýin jáne Qazaqstannyń gır sporty ulttyq federasıasynyń ótinishi boıynsha bas tartýdyń tıisinshe dáleldenbeýin anyqtady.
Osyǵan baılanysty sot komıtettiń aqshalaı syıaqy tóleýden bas tartý jónindegi áreketterin, sondaı-aq mınıstrliktiń shaǵymdy qanaǵattandyrýdan bas tartý jónindegi áreketterin zańsyz dep tanydy jáne kúshin joıdy.
Komıtet sottyń quqyqtyq ustanymyn eskere otyryp, aqshalaı syıaqy tóleý týraly ótinishti qaıta qaraýǵa mindetti.
Sot sheshimi zańdy kúshine engen joq.