Amerıkanyń Mılýokı qalasyndaǵy galereıadan urlanǵan Pablo Pıkassonyń týyndysy segiz jyldan keıin tabyldy. Ofort osy ýaqyt boıy páterdegi qabyrǵada ilýli turǵan, qalyń shań basqan, dep habarlaıdy infohub.kz.
Másele Pıkasso 1949 jyly jasaǵan «Torero» oforty týraly bolyp otyr. Jumys kúrish qaǵazynda oryndalǵan, ramkaǵa salynǵan jáne sýretshiniń qoly qoıylǵan. Mundaı danadan barlyǵy 30-aq bar.
Urlyqqa deıin oforttyń quny 35–50 myń dollar (16–23 mln teńge) dep baǵalanǵan. 2018 jyly jumys Mılýokıdegi Bıll DeLınd galereıasynan joǵalyp ketken edi, osy ýaqyt boıy onyń qaıda ekeni belgisiz boldy.
Ótken aptada polısıa DeLındti tabylǵan jumysty tanýǵa kelýin ótindi. Ol birden bul sol ofort ekenin túsindi.
«Men tańǵaldym. Sózimdi taba almadym. Bul men úshin keremet sát boldy», — dedi DeLınd.
Qosymsha rastaý retinde ramkanyń artqy jaǵyndaǵy japsyrma boldy. Onda DeLind Fine Art Appraisals kompanıasynyń tańbasy saqtalǵan — dál urlyqqa deıingideı.
Bul oqıǵadaǵy eń erekshesi — Pıkassonyń tabylǵan jeri. Múlik ıesi Tım Ders páterdi bosatyp, tazalap júrip ofortty taýyp alǵan.
«Ol qabyrǵada birtúrli jerde ilýli turdy. Ol jerde óte uzaq ýaqyt turǵandaı áser qaldyrdy, sebebi ústinde qalyń shań bar edi», — dedi Ders.
Er adam tabylǵan zatty antıkvar dosyna kórsetti. Ol odan Pıkassonyń týyndysyn tanyp, bul 2018 jyly urlanǵan ofort bolýy múmkin dep boljady. Sodan keıin Ders kartınany polısıaǵa tapsyrdy.
Endi quqyq qorǵaý organdary urlanǵan jumystyń páterge qalaı túskenin jáne osy ýaqyt boıy kim saqtaǵanyn anyqtaýy kerek.
Buǵan deıin Kursiv LifeStyle nasıster urlaǵan kartına Amsterdamda qoqys arasynan tabylǵanyn jazǵan edi.