Qazaqstandyq oqýshylar sıfrlyq tehnologıalardy joǵary deńgeıde meńgergenin jáne oqý oryndarynda ózderin qaýipsiz sezinetinin kórsetti. Ekonomıkalyq yntymaqtastyq jáne damý uıymy (EYDU) jarıalaǵan PISA-2025 halyqaralyq zertteýiniń nátıjeleri osyndaı, dep habarlaıdy infohub.kz saıty.
Oqý-aǵartý mınıstrliginiń málimetinshe, testileýge Qazaqstannyń 643 mektebinen 22 myńnan astam on bes jasar oqýshy qatysty. PISA-nyń jańa bólimderiniń biri sıfrlyq quzyrettilikti baǵalaýǵa arnaldy. Anyqtalǵandaı, qazaqstandyq oqýshylardyń 80%-y jasandy ıntellekt jasaǵan aqparatty tekserý jáne baǵalaý daǵdylaryn úırenedi. Salystyrý úshin, EYDU elderi boıynsha bul kórsetkish ortasha eseppen 63%-dy quraıdy. Sonymen qatar, oqýshylardyń 85%-y sıfrlyq qurylǵylardy paıdalaný erejeleri men usynystary belgilengen mektepterde oqıdy.
Býllıng máselesine keler bolsaq, qazaqstandyq oqýshylardyń 77%-y qorlaýǵa tap bolmaıtynyn aıtty. EYDU boıynsha mundaı oqýshylar ortasha eseppen 53%-dy quraıdy. Respondentterdiń kópshiligi (71%) mektep olardyń eresek ómirge daıyndalýyna kómektesedi dep sanaıdy, al EYDU boıynsha bul kórsetkish 51%-ǵa teń. Oqýshylar muǵalimder tarapynan qoldaýdy da joǵary baǵalady.
PISA-nyń úsh negizgi baǵyty boıynsha qazaqstandyq oqýshylar jaratylystaný ǵylymdarynan ortasha 420 bal, matematıkadan 414 bal jáne oqý saýattylyǵynan 385 bal jınady. Jaratylystaný jáne oqý saýattylyǵy boıynsha nátıjeler aldyńǵy PISA-2022 zertteýiniń deńgeıinde qaldy, al jaratylystaný ǵylymdary boıynsha kórsetkish 2018 jylmen salystyrǵanda joǵary.
Zertteý problemalyq aımaqtardy da anyqtady. Atap aıtqanda, óńirler men mektepter arasyndaǵy úlgerim alshaqtyǵyn qysqartý, oqýshylardyń bazalyq bilimin nyǵaıtý jáne oqytý sapasyn arttyrý qajet. PISA-2025 nátıjelerin taldaý qorytyndysy boıynsha mamandar bilim berý júıesin odan ári jetildirýge arnalǵan usynystar daıyndaıdy, dep atap ótti Oqý-aǵartý mınıstrliginde.
Buǵan deıin vedomstvo basshysy Juldyz Súleımenova ata-analardyń mektepterde shash boıaýǵa, makıaj jasaýǵa jáne manıkúrge tyıym salý týraly shaǵymdaryna túsinikteme bergen edi.