Almaty oblysynyń taýly aýdanynda 37 jastaǵy polısıa qyzmetkeri Aslan Álserovtyń órtengen denesi tabyldy. Osy fakti boıynsha qylmystyq is qozǵaldy. Qaza tapqannyń áıeli Araılym Álserova kúdikti retinde ustalsa, oqıǵa ornynda bolǵan úsh kámeletke tolmaǵan bala úı qamaǵyna alyndy. Bul týraly kznews.kz saıty habarlaıdy.
Ulysmedia basylymy jasóspirimderdiń advokattarymen sóılesip, istiń keıbir mán-jaıyn anyqtady. Advokat Ǵalym Nurpeıisovtiń aıtýynsha, onyń qorǵaýyndaǵy jasóspirim Aslan Álserovtyń ulynyń dosy bolǵan. Oqıǵa bolǵan kúni ol dosynyń úıine PlayStation oınaýǵa kelgen. Qorǵaýshy jasóspirimge psıhologıalyq saraptama taǵaıyndalǵanyn, qazir onymen maman jumys istep jatqanyn aıtty.
"Saraptama taǵaıyndadyq. Qazir onymen psıholog maman jumys istep jatyr. Qorytyndysyn alǵan kezde belgili bolady. Óıtkeni myna jerde tergeýshiler kámeletke tolmaǵan balalarǵa qysym jasap, aldyn ala kelisim jasaǵan. Olar kámeletke tolmaǵan balalar. Oı joq. Olar bilmeıdi, josparlamaıdy. Ana jerde erli-zaıyptylardyń arasynda janjal bolǵan. Balalar shokta bolǵan. Qylmystyq kodekste bar nárse, «eksess soýchastıe» degen. Ol oryssha aıtqanda, "Ne v to vremá, ne v tom meste" bolǵan", – deıdi Ǵalym Nurpeıisov.