Tarazda jeke sot oryndaýshysy boryshkerlerden túsken aqshanyń bir bóligin ıemdenip, jeke maqsatyna jumsaǵan. Úsh jábirlenýshige keltirilgen jalpy zalal 1 mıllıon teńgeden asty, dep habarlaıdy infohub.kz.
Taraz qalasynyń №2 sotynyń anyqtaýynsha, jeke sot oryndaýshysy birneshe epızod boıynsha óndirip alýshylarǵa tıesili aqshany ustap qalǵan. Onyń kinási jábirlenýshiler men kýágerlerdiń aıǵaqtary, zattaı dáleldemeler jáne qylmystyq istiń basqa materıaldarymen dáleldengen. Sot otyrysynda er adam kinásin tolyq moıyndap, keltirilgen zalaldy ótegenin aıtyp, jeńilirek jaza taǵaıyndaýdy suraǵan. Jábirlenýshiler ótemaqy alǵan soń qatań jaza talap etpegen.
Memlekettik aıyptaýshy sottalýshyǵa amnıstıa zańyn qoldana otyryp, eki jyl bas bostandyǵyn shekteý jazasyn taǵaıyndaýdy suraǵan. Sot úkimimen S. Qylmystyq kodekstiń 251-baby 2-bóligi boıynsha kináli dep tanylyp, 2 jylǵa bas bostandyǵyn shekteý jazasy kesildi. Amnıstıa zańy qoldanylyp, sottalýshy negizgi jazany óteýden bosatyldy, — dep málimdedi sot. Sot kináni moıyndaý, zalaldy tolyq óteý jáne sottalýshynyń kámeletke tolmaǵan balalarynyń bolýyn eskergen. Aýyrlatatyn mán-jaılar anyqtalmaǵan. Úkim zańdy kúshine engen.
Buǵan deıin Qazaqstanda jeke sot oryndaýshylarynyń qyzmetin baqylaý kúsheıtilgeni habarlanǵan bolatyn. Olar úshin mindetti atestattaý engizilip, ádilet organdary men jeke sot oryndaýshylary palatasy tekserý kezinde bank úzindilerin suratý quqyǵyna ıe boldy. Atestattaýdan ótpegen jaǵdaıda lısenzıadan aıyrylýy múmkin.