Qozǵalystyń jetispeýi ishek motorıkasyn baıaýlatyp, nátıjesinde dáret sırep, qataıady. Dáriger-proktolog Dıana Iklasova taǵam rasıonyn túzetýmen shektelmeı, turaqty dene júktemesin qosýdy usynady, dep habarlaıdy infohub.kz saıty.
«Kóp otyryp, az qozǵalsaq, ishek motorıkasy baıaýlap, dáret sırep, qataıady. Kún saıyn sportzalda bir saǵat jattyǵý mindetti emes. Qarapaıym júrý, júgirý, júzý nemese kez kelgen basqa dene belsendiligi únemi otyrýdan áldeqaıda jaqsy», — deıdi ol.
Dáriger ishek jumysyn retteý úshin keshendi tásil qajet ekenin atap ótti. Iaǵnı másele tek taǵam men sý ishý rejıminde emes, adamnyń dene belsendiliginde de.
Alaıda ish qatý jıileı bastasa, sebebin anyqtaý mańyzdy, tek ish júrgizetin dárilerdi únemi ishe berý durys emes. Mundaıda mamanǵa júgingen jón.
Sorpany kún saıyn ishý mindetti emes
Iklasova ishek jumysy úshin qalypty dep sanalatyn birneshe jaǵdaıdy mysalǵa keltirdi. Atap aıtqanda, nájis jumsaq ári mazasyzdyq bolmasa, eki-úsh kúnde bir ret úlken dáretke barý qalypty ekenin aıtty.
Sondaı-aq sorpany kún saıyn ishpeý, kúndelikti 2–3 lıtr emes, odan az sý ishý, ár tań saıyn bir ýaqytta dáretke otyrmaý da qalypty dep esepteledi.
Sonymen qatar proktolog ashqarynǵa kofe ishýge bolatynyn, eger odan keıin ózińizdi jaqsy sezinseńiz, eshqandaı qıyndyq joq ekenin atap ótti.
Sońyna deıin shydaıdy
Dárigerdiń aıtýynsha, eń bastysy — mazasyzdyq, belgili bir sımptomdar nemese aýyrsyný paıda bolsa, mindetti túrde mamanǵa qaralý kerek.
«Proktolog bolǵan soń bir nárseni túsindim: adamdar sońyna deıin shydaıdy. Bul — beker. «Ózinen-ózi ketedi» dep kútedi, mazasyzdyqqa úırenip, sımptomdardy jyldar boıy elemeıdi. Al bul salada bári óte qarapaıym: erte kelseń, sheshimi de ońaı. Dáriger retinde shynymdy aıtsam, eń jıi kezdesetin qate — aýrý emes, dárigerge barýdy keıinge qaldyrý», — dedi ol.
Buǵan deıin «Kýrsıv» stress pen ishek máseleleri arasyndaǵy baılanysty ǵalymdar dáleldegenin jazǵan.