Abaı oblysynyń prokýratýrasy iri mys óndirýshi KAZ Minerals Aktogay kompanıasyn ákimshilik jaýapkershilikke tartýdy zańsyz dep tanyp, ony joıdy. Onyń ornyna ekologıa departamentiniń laýazymdy tulǵasy jazalandy, dep habarlaıdy infohub.kz saıty.
«Abaı oblysynda prokýratýra ınvestordyń quqyǵyn qorǵap, KAZ Minerals Aktogay kompanıasyn ákimshilik jaýapkershilikke zańsyz tartýdy joıdy. Oblystyq tabıǵatty qorǵaý prokýratýrasy ekologıa departamenti kompanıaǵa qatysty ákimshilik isti zańda kózdelgen tekserý júrgizbeı jáne memlekettik baqylaýdyń belgilengen tártibin buzyp qozǵaǵanyn anyqtady», – delingen qadaǵalaý organynyń jarıalaǵan habarlamasynda.
Kompanıa tóleýge tıis aıyppul mólsheri naqtylanbaǵan. Sonymen qatar sot ekologıa departamenti basshysynyń orynbasaryn jaýapkershilikke tartty.
«Budan bólek, sot ekologıalyq retteý jáne baqylaý komıtetine anyqtalǵan buzýshylyqtardy joıý týraly jeke qaýly shyǵardy. Ekologıa departamenti basshysynyń orynbasary da jaýapkershilikke tartyldy – sot ony 20 AEK (2026 jyly 86,5 myń teńge) mólsherinde aıyppul túrindegi ákimshilik jaýapkershilikke tartty», – dep atap ótti prokýratýrada. Jazalanǵan laýazymdy tulǵanyń aty-jónin prokýratýra naqtylamady.
Jarıalaý sátinde oblystyq ekologıa departamentiniń saıtynda departament basshysy – Serik Sarbasov, al onyń jalǵyz orynbasary – Oralhan Áýezbekov dep kórsetilgen.
KAZ Minerals Aktogay Qazaqstannyń eń iri mys óndirýshi kompanıasy KAZ Minerals quramyna kiredi. Sońǵysynyń 63,5% aksıasyn Forbes nusqasy boıynsha $5,9 mlrd kapıtalymen eń baı qazaqstandyqtar tiziminde ekinshi orynda turǵan kásipker Vladımır Kım ıelense, 36,5% úlesi onyń mys bıznesindegi kópjyldyq seriktesi Oleg Novachýkke ($388 mln, 30-oryn) tıesili.
KAZ Minerals Abaı oblysynda jylyna 300 myń tonna katodty mys óndiretin mys qorytý zaýytyn 2030-2031 jyldary iske qosady, dep málimdedi «Kýrsıvke» maýsymda KAZ Minerals Management bas dırektory Aıjan Balabatyrova. Mys qorytý zaýyty Abaı oblysynyń Aıagóz aýdanyndaǵy Aqtoǵaı kentiniń mańynda ornalasady. Ol kezde joba boıynsha aldyn ala tehnıkalyq-ekonomıkalyq negizdeme daıyndalǵan. Zaýyt katodty mystan bólek altyn jáne kúmis quımalaryn da shyǵarady.