Nýraı Serikbaıdy óltirý isi boıynsha sot prosesiniń negizgi bóligi aıaqtalyp, taraptar pikirtalasqa kóshti. Memlekettik aıyptaýshy Madıar Ábilqasymov 28 jastaǵy Sherhan Aımahanovty ómir boıy bas bostandyǵynan aıyrýdy surady, dep habarlaıdy infohub.kz saıty.
Prokýrordyń aıtýynsha, aıyptalýshynyń kinási Qylmystyq kodekstiń úsh baby boıynsha tolyq dáleldengen: 99-baptyń 2-bóliginiń 5-tarmaǵy (asa qatygezdikpen óltirý), 125-baptyń 1-bóligi (nekege turýǵa májbúrleý) jáne 115-baptyń 2-bóligi (stalkıng).
«Ómir boıy bas bostandyǵynan aıyrý jazasyn taǵaıyndaýdy suraımyn. Jazany qylmystyq-atqarý júıesiniń erekshe qaýipsizdik mekemesinde óteýdi suraımyn. Jazany óteý merzimin úkim jarıalanǵan kúnnen bastap esepteýdi suraımyn. Aımahanovqa qatysty bultartpaý sharasyn – kúzetpen ustaýdy ózgerissiz qaldyrýdy suraımyn», – dep prokýrordyń sózin keltiredi basylym.
Eske salaıyq, Nýraı Serikbaı 11 qańtarda qaıtys bolǵan. Tergeý jeti aıǵa sozylyp, shildede aıaqtaldy, al sot prosesi 21 shildede bastaldy. Buǵan deıin Aımahanov pyshaq jaraqatyn salǵan sátti esine almaıtynyn aıtyp, tipti qyz oǵan birinshi bolyp soqqy jasaǵanyn málimdegen. Alaıda sot-medısınalyq sarapshy qurbanǵa 35 pyshaq jaraqaty salynǵanyn jáne ol kezde ol áli tiri bolǵanyn aıtty. Psıhologıalyq saraptama Aımahanovtyń qylmys kezinde óz áreketterin tolyq baqylaǵanyn kórsetti.
21 jastaǵy qyzdyń qaıtys bolýy qoǵamda keń rezonans týdyryp, stalkıng pen qyz alyp qashý máselelerine taǵy da nazar aýdartty.