Qazaqstandyq shpagashylar Gonkongta ótip jatqan semserlesten álem chempıonatynda úzdik segizdikke ene almady. Kırıll Prohodov 16-shy, Rýslan Kýrbanov 18-shi orynǵa ıe boldy, dep habarlaıdy infohub.kz saıty.
Qazaqstannyń tórt ókili de irikteý kezeńinen súrinbeı ótti, biraq 1/8 fınaldan ári asa almady. Prohodov fın Kerkko Iarvıny (15:5) jáne dat Konrad Kongstadty (15:9) jeńdi, alaıda keıin Tokıo-2020 olımpıada chempıony ári 2025 jylǵy komandalyq álem chempıony japonıalyq Masarý Iamadadan 11:15 esebimen utyldy.
Qazaqstandyq shpagashylardyń kóshbasshysy Rýslan Kýrbanov byltyr Tbılısıde toǵyzynshy bolǵan nátıjesine jete almady. Búgin 34 jastaǵy semserlesýshi ızraıldik Iegonatan Lambreı Messıkany 15:7 esebimen jeńip tastady, biraq keıin reıtıńte ózinen tómen japondyq Rú Masýmotoǵa kútpegen jerden 9:10 esebimen utyldy.
Ertaı Serlık ońtústikkoreıalyq O Mın Kvonnan 10:15 esebimen utyldy. Vadım Sharlaımov Amerıkandyq Vırgın araldarynan kelgen Krýz Shembrıge 9:15 esebimen ese jiberdi. Qorytyndy esepte Serlık 41-shi, Sharlaımov 50-shi orynǵa ıe boldy.
Búgin qazaqstandyq sabláshylar da jarqyraı almady, buryn irikteý kezeńinde jaqsy óner kórsetken edi. Aıgerım Sarybaı Parıj-2024 komandalyq kúmis júldegeri ońtústikkoreıalyq Chon Ha Ionnan 10:15 esebimen utylyp, 53-shi orynǵa taban tiredi. Karına Dospaı ıtalıalyq Mıkele Battıstonǵa 7:15 esebimen ese berip, 57-shi boldy. Anastasıa Gýlık vengrıalyq eki dúrkin komandalyq álem chempıony Shýgar Kattınka Battaımen birdeı eseppen aıqasyp, 61-shi oryndy qanaǵat tutty.
Shpagashylar men sabláshylardyń jekeleı synynda júldegerler búgin keshke anyqtalady. Osy qarý túrinen komandalyq jarystar 29 shildede ótedi.
Semserlesten álem chempıonaty 71-shi ret ótýde. Týrnırde 12 medal jıyntyǵy sarapqa salynady. Alǵashqylary keshe ıelerin tapty. ÁCH-2026 júlde qory – 1,02 mıllıon dollar.