Qazaqstanda halyqtyń psıhıkalyq densaýlyǵyn saqtaý júıesin jańǵyrtý josparlanýda. 2027–2030 jyldarǵa arnalǵan jańa keshendi jospar saldardy emdeýden aldyn alýǵa, buzýshylyqtardy erte anyqtaýǵa jáne adamǵa kómektiń barlyq kezeńderinde qoldaý kórsetýge baǵyttalǵan, dep habarlaıdy inbusiness.kz.
Másele úkimette Premer-Mınıstrdiń orynbasary – Mádenıet jáne aqparat mınıstri Aıda Balaevanyń tóraǵalyǵymen ótken keńeste talqylandy. Densaýlyq saqtaý mınıstri Aqmaral Álnazarovanyń aıtýynsha, búginde mamandandyrylǵan medısınalyq-áleýmettik kómek eki respýblıkalyq klınıkada, 20 óńirlik psıhıkalyq densaýlyq ortalyǵynda, 98 alǵashqy kómek ortalyǵynda jáne 212 aýyldyq psıhıkalyq densaýlyq kabınetinde kórsetiledi.
Sonymen qatar salada ambýlatorıalyq kómek pen medısınalyq ońaltýdy damytý jalǵasýda, balalar psıhıatrıasyna arnalǵan tósek-oryndar sany artyp, kadrlyq áleýet nyǵaıtylýda. Degenmen, ınfraqurylymdy jańǵyrtý jáne materıaldyq-tehnıkalyq bazany jańartý qajettiligi saqtalyp otyr.
Jańa jospar emhanalar jumysyna psıhıkalyq densaýlyq mamandaryn biriktirýdi, erte dıagnostıkany damytýdy, pasıenttiń jolyn sıfrlandyrýdy, kadr daıarlaýdy kúsheıtýdi jáne ınfraqurylymdy jańartýdy kózdeıdi. Balalar men jasóspirimderge qoldaý kórsetýge erekshe nazar aýdarylady.
Sonymen qatar, salalyq vedomstvolar ǵylymı zertteýlerdi damytý, mamandar daıarlaýdy jetildirý, bilim berý baǵdarlamalaryn jańartý, pedagogtar men psıhologtardyń biliktiligin arttyrý boıynsha usynystar usyndy. Basymdyqtar qatarynda múgedektigi bar balalar men eresekterge arnalǵan arnaýly áleýmettik qyzmetter júıesin jáne ınfraqurylymdy damytý bar.