Qazaqstannyń ekinshi raketkasy Iýlıa Pýtınseva Japonıada ótip jatqan Azıa oıyndarynyń tenıs týrnırinde jartylaı fınalǵa shyqqan alǵashqy qazaqstandyq tenısshi atandy: shırek fınalda ol Taıland ókili Mananchaıa Savangkaevty 6:3, 6:0 esebimen jeńdi, dep habarlaıdy infohub.kz saıty.

Pýtınseva qarsylasyna esin jınaýǵa múmkindik bermedi: artqy syzyqtan jasaǵan qýatty ári dál soqqylaryn aılaly qysqa doptarmen ushtastyryp otyrdy. 1 saǵat 14 mınýttan keıin taılandtyq tenısshi jeńilisin moıyndady.

Qazaqstan – Taıland arasyndaǵy ózindik machty erler jalǵastyrdy. Aleksandr Shevchenko Maksımýs Djonsty 6:1, 6:4 esebimen jeńip, shırek fınalǵa shyqty. Tımofeı Skatov Kasıdıt Samreıge 2:6, 6:7 (6:8) esebimen jol berdi.

Jibek Qulambaeva Soná Jıenbaevamen birge myqty japondyq Shýko Aoıama/Ena Sıbahara jubyn 6:4, 6:4 esebimen tize búktirdi. Bizdiń qyzdar da shırek fınalǵa ótti.

AZIA OIYNDARY-2026

Tenıs. 30 qyrkúıek

Áıelder. 1/4 fınal

🎾 Iýlıa PÝTINSEVA (Qazaqstan, 82) – Mananchaıa SAVANGKAEV (Taıland, 90) 6:3, 6:0

Erler. 1/8 fınal

🎾 Tımofeı SKATOV (Qazaqstan, 204) – Kasıdıt SAMREI (Taıland, 389) 2:6, 6:7 (6:8)

🎾 Aleksandr SHEVCHENKO (Qazaqstan, 109) – Maksımýs DJONS (Taıland, 487) 6:1, 6:4

Áıelder. Juptyq. 1/8 fınal

🎾 Jibek QULAMBAEVA (105)/Soná JIENBAEVA (384) (Qazaqstan) – Shýko AOIaMA (23)/Ena SIBAHARA (76) (Japonıa) 6:4, 6:4

Búgin tenıs Azıadasynda qazaqstandyqtar qatysatyn taǵy tórt mach ótedi.

XX Jazǵy Azıa oıyndary 19 qyrkúıekte resmı túrde ashyldy jáne 4 qazanda aıaqtalady. 45 eldiń sportshylary qatysatyn jarysta 460 komplekt medal sarapqa salynýda. Azıada-2026-da Qazaqstan quramasynyń sapynda 35 sport túrinen 558 sportshy synǵa túsýde.

Oıyndardyń birinshi kúni qazaqstandyqtar tórt altyn medal jeńip aldy. Oıyndar chempıondary atanǵandar: veloshabandozdar Rınata Sultanova men Alekseı Lýsenko, sondaı-aq karatıster Jolaman Bıgabyl men Sofá Berýlseva. Qurama qorjynyna besinshi altyndy MMA saıyskeri Erkinǵalı Búrkitalın qosty. Altynshysyn – aralas jekpe-jektegi komandalasy Qadyrbek Shynbaev. 23 qyrkúıekte Lýsenko AI-2026-nyń eki dúrkin chempıony atandy. Segizinshi joǵary synaqtaǵy medaldi 24 qyrkúıekte eskekshiler Vladıslav Iakovlev pen Ivan Chernýhın erler arasyndaǵy juptyq esý saıysynda jeńip aldy. Toǵyzynshy altyn medaldi bizdiń shpaga sheberleriniń komandasy ıelendi.

Oıyndardyń on kúninen keıin Qazaqstan beıresmı medal esebinde segizinshi orynda turdy.