Ақтөбе облысының Мұғалжар аудандық соты Қандыағаштағы «Тұмар» мейрамханасының иесін тойдан кейін уланып қалған әйелге 222 725 теңге төлеуге міндеттеді, деп хабарлайды infohub.kz сайты.
«Диапазон» басылымының мәліметінше, зардап шеккен әйел сот арқылы моральдық зиянды өтеу мен емделу шығынын өндіріп алуға тырысқан. Ол тойға қатысқан соң уланып, аурухана төсегіне тап болған.
Жазда Қандыағаштағы «Тұмар» мейрамханасында жаппай улану орын алған: той мен садақаға барған 188 адам зардап шеккен. Оның 177-сі ішек инфекциясының белгілерімен ауруханаға жатқызылды.
Зардап шеккендердің бірі кінәлілерден емделу шығыны мен моральдық зиянды заңды түрде өндіріп алуға бел буды.
Мұғалжар аудандық сотының хабарлауынша, мейрамхана иесі талап-арызды ішінара мойындаған. Ол дәрі-дәрмек пен емделу шығынын өтеуге келіскен, алайда моральдық зиянды өтеу талабын мойындамаған. Сот басқаша шешті: жауапкерден 22 725 теңге материалдық шығын және 200 000 теңге моральдық зиян өтемақысы өндірілді.
Бұған дейін маусымда Ақтөбе облысында Қандыағаштағы мейрамханаға барғаннан кейін Мұғалжар аудандық ауруханасы мен облыстық клиникалық инфекциялық ауруханаға ішек инфекциясының белгілерімен 100-ден астам науқас жатқызылғаны хабарланған.
Сол кезде полиция санитарлық ережелерді немесе гигиеналық нормативтерді бұзу белгілері бойынша қылмыстық іс қозғаған (Қазақстан Республикасы Қылмыстық кодексінің 304-бабы).
Кейін Қандыағаштағы мейрамханаға барғандар арасында ауруханаға жатқызылғандар саны артқаны белгілі болды. Мекеме жабылды.
Одан әрі санитарлық дәрігерлер Қандыағаштағы мейрамханадағы жаппай улануды тергеуді аяқтады. Тексеру стафилококк, ішек таяқшасы және бірқатар бұзушылықтарды анықтады. Нәтижелері құқық қорғау органдарына жіберілді.
Сонымен қатар жаппай улану орын алған мейрамхананың иесі мен басшысы амнистияға іліккені белгілі болды.