Áleýmettik jelide qazaqstandyq áıeldiń Almaty taýlarynda serýendep júrip, qar barysymen kezdeısoq kezdesken sáti túsirilgen vıdeo paıda boldy. Onyń aıtýynsha, sırek kezdesetin ań «taý soqpaǵyna jaı ǵana shyǵa kelgen», dep habarlaıdy infohub.kz saıty.
quasar.hcn degen nıkpen tirkelgen qoldanýshy Instagram-da áńgimesin jarıalady. Ol bolǵan jaǵdaıdy bylaı sıpattady: «Qazaqstan, Almaty. Taýlardyń elesi. Muny shynymen kórgenimizge áli kúnge deıin sený qıyn. Kóterilip kele jatqanymyzda artymyzdan bir ıt erdi. Ol buǵan deıin de úrip qoıatyn. Tıinderge áreket etetinin kórgenbiz, sondyqtan alǵashynda oǵan mán bermedik. Kamera sol kezde qosylyp turǵan, men kóterilýdi túsire berdim. Sol sátte týra soqpaqqa qar barysy shyǵa keldi. Biz, árıne, tańǵalyp qaldyq. Mundaı jaǵdaıda eń bastysy — ańǵa jaqyndamaý jáne ıttiń onymen janasýyna jol bermeý edi. Itti odan alastatyp, ózimizben alyp ketýge tyrystyq, biraq ol bizge kelmeı, úre berdi».
Biraz ýaqyttan keıin, jarıalanym avtorynyń aıtýynsha, ekinshi jaqtan basqa týrıser kelip qosyldy. «Barys tynysh qana betkeımen joǵary qaraı ketip qaldy. It ony qaıta baıqap, úre bastaǵanda, jigitter ony alyp, tómen qaraı alyp ketti. Soqpaqpen kele jatqan taǵy birneshe adamdy kútip, birge osy bólikten óttik. Baıqaǵanymyzdaı, janynda oljasy bolýy múmkin, ıisin sezdik, biraq oljanyń ózin kórmedik. Sondyqtan ańǵa artyq jaqyndamaýǵa jáne ony ashýlandyrmaýǵa tyrystyq», — dep áńgimeledi qazaqstandyq.
Áıel jabaıy ańmen kezdesý múldem kezdeısoq bolǵanyn jáne ony eshqashan umytpaıtynyn atap ótti. «Qar barysynyń qanshalyqty sırek jáne qundy ekenin túsinemiz, sondyqtan naqty ornyn ádeıi kórsetpeımiz», — dep jazdy ol.
NUR.KZ tilshisi İle-Alataý ulttyq tabıǵı parkinen pikir surap habarlasty.