Qaraǵandyda Álıhan Bókeıhan aýdandyq soty damý múmkindigi shekteýli balalar úıiniń tárbıelenýshisinen aqsha bopsalaý týraly qylmystyq isti qarady. Eki aıyptalýshy 3 jyl 6 aıdan bas bostandyǵynan aıyryldy, dep habarlaıdy infohub.kz saıty.
Qaraǵandy oblysy sottarynyń resmı Telegram-arnasynda jazylǵandaı, fıgýranttar aldyn ala sóz baılasý arqyly adamdar tobymen zorlyq-zombylyq qoldaný qaýpimen bopsalaý jasady dep aıyptaldy (Qylmystyq kodekstiń 194-babynyń 2-bóligi).
Sot anyqtaǵandaı, 2025 jyldyń tamyzynda sottalýshylar damý múmkindigi shekteýli balalar úıiniń tárbıelenýshisiniń arnaıy shotynda 3 mln teńgeden astam qarajat jınalǵanyn bilgen. Bul qarajat memleketten aı saıynǵy járdemaqy túrinde túsip otyrǵan.
2025 jylǵy 20 tamyzda Shyǵys-2 shaǵyn aýdanyndaǵy úı aýlasynda sottalýshylardyń biri jábirlenýshiden bul aqshany berýdi dóreki túrde talap etti. Óz ómirinen qoryqqan jábirlenýshi kelisti. Osydan keıin sottalýshylar ony birneshe ret bank bólimshesine 3 mln teńge alýǵa apardy, alaıda bank mektep basshylyǵynyń anyqtamasy joq bolǵandyqtan bas tartty.
2026 jylǵy 4 qańtarda sottalýshy jábirlenýshige uıaly telefonyn lombardqa ótkizýdi usyndy. Bastan tartqannan keıin kelesi kúni eki aıyptalýshy da dene jaraqatyn keltirý qaýpimen balalar úıiniń tárbıelenýshisinen aqsha nemese uıaly telefon talap etti. Qaýipten qoryqqan jábirlenýshi olarǵa quny 189 myń teńge turatyn uıaly telefonyn berdi.
Sottalýshylardyń kinási olardyń moıyndaý kórsetpelerimen, jábirlenýshiniń, kýálardyń kórsetpelerimen jáne istiń basqa da materıaldarymen tolyq dáleldendi.
Jábirlenýshi qatań jaza taǵaıyndaýdy surady. Qorǵaýshy tarap bas bostandyǵynan aıyrýǵa baılanysty emes jaza taǵaıyndaýdy surady.
Jaza taǵaıyndaý kezinde bir sottalýshyǵa qatysty qylmystyq jaýaptylyq pen jazany jeńildetetin mán-jaı retinde kámeletke tolmaǵan balasynyń bolýy jáne shyn júrekten ókinýi, al ekinshi sottalýshyǵa qatysty — shyn júrekten ókinýi eskerildi. Sottalýshylardyń qylmystyq jaýaptylyǵy men jazasyn aýyrlatatyn mán-jaılar anyqtalǵan joq.
Sot úkimimen sottalýshylar Qylmystyq kodekstiń 194-babynyń 2-bóliginiń 2-tarmaǵynda kózdelgen qylmys jasaýda kináli dep tanyldy. Múmkindigi shekteýli balalar úıiniń tárbıelenýshisine qatysty jasalǵan, zorlyq-zombylyq qoldaný qaýpimen jasalǵan quqyqqa qarsy árekettiń sıpaty men qoǵamdyq qaýiptiligin, sondaı-aq jańa qylmystyq quqyq buzýshylyqtardyń aldyn alý maqsatyn eskere otyryp, olarǵa 3 jyl 6 aı bas bostandyǵynan aıyrý jazasy taǵaıyndaldy.
Sot úkimi zańdy kúshine engen joq.