Qaraǵandy oblysynda ondaǵan dala órti tirkeldi: sońǵy táýlikte segiz oshaq sóndirildi, taǵy beseýimen kúres jalǵasýda, dep habarlaıdy infohub.kz saıty.
Qazaqstan Respýblıkasy Tótenshe jaǵdaılar mınıstrliginiń Telegram-arnasynda málim etkendeı, qutqarýshylar Qarqaraly, Buqar-Jyraý, Nura, Osakarov aýdandary men Qaraǵandy qalasynyń aýmaǵynda segiz tabıǵı órtti sóndirdi. Aldyn ala derekter boıynsha, ot 200 gektar jerdi sharpyǵan.
Qazirgi tańda Shet, Buqar-Jyraý jáne Qarqaraly aýdandarynyń taýly-dalaly aımaǵynda qurǵaq shóp pen butalardyń tutanýyna baılanysty órtterdi sóndirý jumystary jalǵasýda.
«Sóndirý jumystary qıyn qoljetimdi taýly-dalaly relefke, ornyqqan ystyq aýa raıyna jáne qatty ekpindi jelge baılanysty qıyndap otyr. Jeldiń saldarynan ottyń taralý baǵyty birneshe ret ózgerdi. Órtterdi sóndirýge TJM, jergilikti atqarýshy organdar men orman sharýashylyqtarynyń 400-den astam qyzmetkeri jáne 100-den astam tehnıkasy jumyldyryldy», — dep atap ótti vedomstvoda.
Tótenshe jaǵdaılar mınıstrligi operatıvtik shtabtyń táýlik boıy jumys istep jatqanyn qosty. Órt jaǵdaıyna únemi monıtorıń júrgizilip, kúshter men quraldardy úılestirý jumystary atqarylýda.