Qaraǵandy oblysynyń respýblıkalyq jáne oblystyq avtomobıl joldarynda 25 qyrkúıekten bastap 19 mobıldi blokbeket jumys isteı bastady. Olar qys túskenge deıin jumys isteıdi, dep habarlaıdy infohub.kz saıty.
İshki ister mınıstrliginiń vedimistik saıtynda habarlanǵandaı, polısıa osylaısha mal men et ónimderin tasymaldaýdy baqylaýdy kúsheıtti. Shara dástúrli kúzgi mal soıý qarsańynda qabyldanyp, eń aldymen mal urlyǵynyń aldyn alýǵa jáne ony toqtatýǵa baǵyttalǵan.
Beketterde polısıa qyzmetkerleri mal men et ónimderin tasymaldaıtyn kólikti, sondaı-aq olardyń shyǵý tegin jáne tasymaldaýdyń zańdylyǵyn rastaıtyn qujattardy tekseredi. Qajetti qujattar bolmaǵan jaǵdaıda kólik tekserý júrgizý jáne júktiń ıesin anyqtaý úshin aýmaqtyq polısıa bólimine jetkiziledi.
«Mobıldi blokbeketter mal men et ónimderiniń qozǵalysynyń negizgi baǵyttaryn baqylaýǵa múmkindik beredi. Eger qujattar kúmán týdyrsa nemese múlde bolmasa, júk onyń shyǵý tegi men ıesi anyqtalǵansha tekseriledi. Ótken jyly Temirtaý mańyndaǵy blokbekette polıseıler Aqmola oblysynda urlanǵan 46 jylqyny tapqan bolatyn. Sondyqtan mundaı beketterdiń mal urlyǵynyń aldyn alý men ony ashýda mańyzy zor», — dedi Qaraǵandy oblysy polısıa departamenti krımınaldyq polısıa basqarmasy bastyǵynyń orynbasary Meıirjan Slambekov.
İshki ister mınıstrliginiń dereginshe, mobıldi blokbeketter qys túskenge deıin jumys isteıdi.