Qaraǵandyda 23 jastaǵy qyzdyń qazasyna qatysty burynǵy polısıa maıoryna qarsy sot prosesi bastaldy. Qyzdyń denesi ýchaskelik polısıa qyzmetkeriniń kabınetinen tabylǵan bolatyn. Sot isti jabyq túrde qaraýǵa sheshim qabyldady, dep habarlaıdy infohub.kz saıty.
Otyrysqa marqum qyzdyń anasy men apasy keldi. KTK telearnasynyń dereginshe, olardyń múddesin oblystyq prokýratýra qorǵaıdy.
Talqylaý bastalmaı turyp, sottalýshynyń qorǵaýshysy Áset Túbekov prosesti jabyq ótkizýdi surady. Ol is materıaldarynda óz qorǵalýshysy men marqum qyzdyń jeke ómirine qatysty málimetter bar ekenin alǵa tartty.
«İs materıaldarynda meniń qorǵalýshym men jábirlenýshige qatysty ıntımdik sıpattaǵy málimetter, jeke hat almasýlar bar. Sondyqtan sot otyrysyn jabyq túrde ótkizýdi suraımyn», — dedi Túbekov.
Sýdıa ótinishti qanaǵattandyryp, jýrnalıserden zaldan shyǵýdy surady. Al marqumnyń týystary, kerisinshe, BAQ ókilderiniń proseske qatysýyna ruqsat berýdi ótingen.
Qaıǵyly oqıǵa ótken jyldyń qyrkúıeginde bolǵan. Saǵat 22:00 shamasynda ýchaskelik polısıa qyzmetkeriniń kabınetinen 23 jastaǵy qyzdyń jalańash denesi tabyldy. Kórshi kabınette 36 jastaǵy polısıa maıory esinen tanyp jatqan.
KTK habarlaýynsha, ol kezde polıseı men qyz esirtki qoldanyp, esirtki zattarynan ýlanýy múmkin degen aqparat taraǵan. Sondaı-aq marqumnyń tirek pýnktine birneshe ret kelgeni aıtylǵan. Telearnanyń dereginshe, polısıa basshylyǵy bul málimetterdi rastaǵan da, joqqa shyǵarǵan da joq.
Ýchaskelik qyzmetker esin jıǵan soń, ony jumystan shyǵaryp, oqshaýlaǵyshqa qamady.
Marqumnyń bes jasar uly qaldy. Onyń jaqyndary burynǵy polıseı qyzmet babyn paıdalandy dep eseptep, ótemaqy talap etip otyr.
«Ol anasynyń ruqsatynsyz eshqaıda shyǵa almaıtyn. Ol qyzdy shaqyryp alyp, osyndaı halge jetkizdi. Bálkim, ony paıdalanyp, ondaı áreketter jasaǵan shyǵar. Ótemaqy tólesin. Bala jetim qaldy, kún saıyn anasyn izdep jylaıdy», — dedi marqumnyń týysy.
Oqıǵadan keıin Qaraǵandynyń birneshe polısıa qyzmetkeri men oblystyq departamenttiń qyzmetkerleri tártiptik jaýapkershilikke tartyldy. Olarǵa qatań sógis berilip, aýdandyq polısıa bóliminiń bastyǵy jumystan shyǵaryldy.
KTK málimetinshe, qylmystyq is QK-niń 370-baby — «Qyzmette áreketsizdik» boıynsha qozǵalǵan. Telearna aýyr zardaptardy eskersek, jaza jeti jylǵa deıin bas bostandyǵynan aıyrý bolýy múmkin dep habarlaıdy.
Marqumnyń anasy sottalýshyǵa tym jeńil jaza taǵaıyndalýynan qorqady. Ári qaraıǵy talqylaý jabyq esik jaǵdaıynda ótedi.