Qaraǵandyda polısıanyń burynǵy maıoryna qatysty jabyq sot otyrysy bastaldy. Tergeý dereginshe, bir jyl buryn onyń kabınetinen 23 jastaǵy qyzdyń denesi tabylǵan, dep habarlaıdy infohub.kz saıty.
KTK telearnasynyń málimetinshe, osynaýshýly is qoǵamda keń rezonans týdyrdy. Sot aldyna polısıanyń burynǵy ofıseri tústi. Bir jyl buryn ol jumys ornynda koma kúıinde tabylsa, kórshi bólmeden 23 jastaǵy qyzdyń máıiti tabylǵan. Aldyn ala nusqa boıynsha, oqıǵaǵa qatysqan eki adam da esirtkiden aýyr ýlanyp qalǵan.
Bul is boıynsha tergeý bir jylǵa sozylyp, endi materıaldar resmı túrde sot organdaryna jiberildi. Otyrysty jabyq esik jaǵdaıynda ótkizýge sheshim qabyldandy.
Sottyń alǵashqy otyrysyna qaza tapqan qyzdyń anasy men apaıy keldi. Otbasynyń múddesin is barysynda oblystyq prokýratýra qorǵap otyr.
Otyrys resmı bastalmaı turyp, eks-polıseıdiń advokaty Áset Túbekov prosesti jabyq rejımde ótkizý týraly ótinish jasady. Ol materıaldarda jeke hat almasýlar men ıntımdik sıpattaǵy málimetter bar ekenin, olardyń jarıa bolýy qajet emestigin túsindirdi. Sottalýshy marqummen aradaǵy qarym-qatynasynyń bólshekteri jarıa etilýine qarsy shyqty. Sýdıa bul ótinishti qanaǵattandyryp, baspasózdi zaldan shyǵarýǵa mindettedi.
Eske salaıyq, Qaraǵandydaǵy polısıanyń bir tirek pýnktinen qyzdyń denesi men esinen tanyp qalǵan ýchaskelik ınspektor tabylǵan bolatyn. Keıin ishki ister vıse-mınıstri Sanjar Ádilov Qaraǵandy polısıa pýnktinen qyzdyń denesi men esinen tanyp qalǵan ýchaskelik ınspektordyń tabylǵany týraly jańalyqqa pikir bildirdi. Al İİM basshysy bul oqıǵany «uıat» dep atady. 2025 jyldyń qarashasynda polıseıge kýáger mártebesi berilgeni belgili boldy.