Qaraǵandyda kardıohırýrgıanyń jańa tehnologıasy engizildi: jergilikti mamandar keýde qýysyn tolyq ashpaı, qabyrǵa arasynan uzyndyǵy shamamen jeti santımetr kesik arqyly az ınvazıvti koronarlyq shýnttaý jasaıdy, dep habarlaıdy infohub.kz saıty.
Oblys ákimdiginiń málimetinshe, otalar júrekti toqtatpaı jasalady. Bul ádis semizdigi bar naýqastarǵa da qolaıly, al odan keıingi qalpyna kelý áldeqaıda jyldam júredi.
«Shaǵyn kesiktiń arqasynda jaraqat az, ońaltý jeńil. Otadan keıin naýqastar aýrýhanada shamamen úsh kúnge deıin jatyp, sodan keıin shyǵarylady», — dedi kardıohırýrg Tamerlan Muqajanov.
№2 qalalyq aýrýhananyń dárigerleri Astanadan kelgen hırýrgtermen birlesip, keýde qýysyn tolyq ashpaı jasalǵan alǵashqy tórt júrek otasyn sátti ótkizdi. Oqý aıaqtalǵan soń qaraǵandylyq mamandar mundaı otalardy óz betinshe jasaı alady, bul óńir turǵyndaryna ozyq medısınalyq kómekti qoljetimdi etedi.
Aıta keteıik, bul — qaraǵandylyq hırýrgterdiń oqýynyń ekinshi kezeńi: buǵan deıin olar praktıkalyq bilim alý úshin Astanaǵa barǵan.
Qazaqstan Respýblıkasy Prezıdenti İs basqarmasynyń medısınalyq ortalyǵy aýrýhanasynyń kardıohırýrgıa bóliminiń meńgerýshisi Álibek Toıbaevtyń aıtýynsha, endi hırýrgter osyndaı otalardy óńirde óz betinshe jasaı alady.
Buǵan deıin «Kýrsıv» Manǵystaýda hırýrgter «menıngoradıkýlosele» dıagnozy qoıylǵan jańa týǵan nárestege alǵash ret neırohırýrgıalyq ota jasaǵanyn jazǵan. Sondaı-aq Óskemende neırohırýrgıalyq robotty qoldanyp, alǵashqy sátti ota jasalǵany habarlanǵan.