Bir túıir irimshikti taýyp alyp,
Aǵashqa Qarǵa qondy ushyp baryp.
Toq sanap irimshikti kóńiline,
Jeı qoımaı, otyr edi oıǵa qalyp.
Qashannan belgili ańqaý ala Qarǵa,
Násipke buıyrmaǵan shara bar ma?
Shyǵatyn shyǵasyǵa bolyp sebep,
Aǵashty Túlki zalym aralar ma!
Tistegen irimshigin Túlki kórip,
Aıaǵyn eptep basyp jaqyn kelip:
«Ýh! - dedi, - kóretin de kún bar eken,
Júrýshi em syrttan asyq bolyp ólip!
Tamasha qaraǵanǵa túriń qandaı,
Mynaý kóz, mynaý moıyn, muryn qandaı!
Gaýhardaı qanattaryń jarqyraıdy,
Kelisti qalaı bitken jáne mańdaı!
Kórkemdik sıpatyńnan tabylǵanda,
Daýsyń da bolsa kerek shyryn-baldaı!
Kópten-aq dabysyńdy estisem de,
Bolǵan soń kele almadym jerim shalǵaı.
Seni izdep kelip turmyn alys jerden,
Sulý dep maqtaǵan soń árkim kórgen.
«Halyq aıtsa, qalyp aıtpaıdy» degen ras,
Arman joq janda seni kórip ólgen!
Kórkińdi bitire alman jazyp hatqa,
Ia sóılep jetkize alman aıtyp jatqa.
Men qaıran: «Neǵyp patsha qoımaǵan?» - dep,
Daýsyń da sıpatyndaı bolǵan shaqta!
Nuryndy kún sekildi kórip turmyn,
Shydamaı, boıym balqyp, erip turmyn.
Daýsyndy tym bolmasa bir shyǵarshy,
Estýge qumar bolyp ólip turmyn».
Máz bolyp, maqtaǵanǵa nasattanyp,
Qaıtpasyn, dep oılady, saǵy synyp.
Alystan aryp-ashyp izdep kelgen
Baıǵustyń ketsin dedi kóńili tynyp.
Ótirik maqtaǵanǵa Qarǵa erip,
«Qarq» etti pármeninshe jaǵyn kerip.
İrimshik «qarq» etkende jerge túsip,
Jep alyp Túlki ketti jortyp-jelip.

* * *
Qarasaq, kóp adamdar Túlki bop júr,
Zalymdyq ótirik pen múlki bop júr.
Solardyń sumdyǵyna túsinbegen
Qarǵadaı jurtqa mazaq, kúlki bop júr.
Jurt edik ańqaý ósken qazaq bolyp,
Dalada keń sahara kóship-qonyp.
Aldaǵan zalymdardyń tiline erip,
Júrmesek jarar edi mazaq bolyp.

---