Qazaqstanda «Qarmet» AQ-na (burynǵy «ArselorMıttal Temirtaý») 1,5 mıllıard teńgeden astam shyǵyn keltirgen uıymdasqan qylmystyq toptyń 13 múshesine qatysty úkim shyqty, dep habarlaıdy infohub.kz saıty.
Qaraǵandy oblysy prokýratýrasynyń málimetinshe, 2026 jylǵy 10 tamyzda Astana qalasynyń qylmystyq ister jónindegi aýdanaralyq soty barlyq aıyptalýshylardy aqsha qarajatyn jymqyrýda jáne uıymdasqan qylmystyq topqa qatysýda kináli dep tanydy.
Sot anyqtaǵandaı, qylmystyq sqema 2021 jylǵy qańtardan 2023 jylǵy jeltoqsanǵa deıin jumys istegen. Top músheleri basshylardyń biriniń jetekshiligimen kásiporynǵa temirjol vagondaryn jetkizýdi uıymdastyrǵan. Bul vagondarda sapaly metal synyǵynyń ornyna shlak, qum, qıyrshyq tas, topyraq jáne basqa da metal emes qospalar kóp bolǵan.
«Sqemaǵa qatysýshylar rólderdi aldyn ala bólisken. Keıbireýleri vagondardyń kásiporyn aýmaǵyna kedergisiz ótýin jáne olardyń jedeldetilgen túrde túsirilýin qamtamasyz etse, basqalary metal synyǵynyń lastaný kórsetkishterin jasandy túrde tómendetýge yqpal etken. Osy áreketterdiń nátıjesinde «Qarmet» AQ-na 1 mlrd 503 mln 954 myń teńge kóleminde shyǵyn keltirildi», — dedi prokýratýrada.
Memlekettik aıyptaýshylar dáleldemelerdi jan-jaqty jáne obektıvti zertteýdi qamtamasyz etti. Nátıjesinde aıyptalýshylar ártúrli merzimderge sottaldy. Biraq qylmystyq jaýapkershilik jasalǵan istiń jalǵyz saldary bolmady.
Memlekettik aıyptaýshynyń ustanymy boıynsha sot qylmystyq jolmen tabylǵan múlikti memleket kirisine aınaldyrýdy uıǵardy. Tárkilengen múlik qatarynda kólik quraldary, jyljymaıtyn múlik jáne sottalǵandardyń banktik shottaryndaǵy aqsha qarajaty bar. Memleket kirisine aınaldyrylǵan múliktiń jalpy quny shamamen 1 mlrd teńgeni qurady.
Sondaı-aq sot «Qarmet» AQ-nyń talap aryzdaryn qanaǵattandyrdy. Sottalǵandardan keltirilgen zalaldy óteý úshin 803 mln 954 myń 694 teńge birlesip óndirildi.
Úkim zańdy kúshine engen joq.
Eske salaıyq, buǵan deıin Qarmet-tiń burynǵy qyzmetkerleri men merdiger uıymdardyń qyzmetkerleri bolǵan 14 adam mıllıard teńge jymqyrdy degen kúdikke ilingeni habarlanǵan bolatyn.