Qashaǵanda gaz óńdeıtin zaýyt salyp jatqan GPCI jobalaý kompanıasyndaǵy 75 paıyz úlesti katarlyq UCC Holding-ke satý eki jylǵa sozylyp ketti: mámileni 2024 jyly aıaqtaý josparlanǵan edi, biraq ol áli júzege aspady, dep habarlaıdy infohub.kz saıty.
«Samuryq-Qazyna» holdıńi jartyjyldyq esebinde GPCI jobalaý kompanıasyndaǵy 75 paıyz úlesti satyp, ózinde 25 paıyzdy qaldyrýdy josparlap otyrǵanyn kórsetti. Bul Qatar men Qazaqstan arasyndaǵy strategıalyq kelisimde qarastyrylǵan. Endi satýdy 2026 jyldyń sońyna deıin aıaqtaýdy kózdep otyr.
Katar tarapymen kelisim 2024 jyldyń aqpanynda Qazaqstan prezıdenti Qasym-Jomart Toqaevtyń arab eline sapary kezinde jasalǵan bolatyn. Sonda QazaqGaz ben katarlyq UCC Holding Qashaǵanda jylyna 1 mlrd tekshe metr jáne 2,5 mlrd tekshe metr qýattylyqtaǵy eki gaz óńdeý zaýytyn birlesip salýǵa kelisken.
GPCI kompanıasy solardyń ekinshisin — ken ornynan shyǵatyn ilespe gazdy óńdeýge arnalǵan jylyna 2,5 mlrd tekshe metr qýattylyqtaǵy gaz óńdeý zaýytyn jobalaýmen jáne salýmen aınalysady.
Birlesken jobany júzege asyrý úshin GPCI-degi baqylaý úlesin UCC Holding-ke satý kerek edi. Bastapqyda mámileni 2024 jyldyń sońyna deıin jabý josparlanǵan, keıin 2025 jyldyń ortasy dep habarlanǵan, alaıda kompanıa katarlyqtarǵa áli satylǵan joq.
«Aktıvti alǵashqy ret satýǵa arnalǵan top retinde jiktegen kúnnen bastap 12 aı ishinde satý aıaqtalmady. Bul eń aldymen mámileniń úkimetaralyq sıpatyna jáne satyp alýshymen keıbir komersıalyq jáne sharttyq máseleler boıynsha jalǵasyp jatqan kelissózderge baılanysty», — delingen «Samuryq-Qazyna» esebinde.
Holdıń katarlyqtarmen kelissózder áli jalǵasyp jatqanyn atap ótti. Esepke sáıkes, satýǵa arnalǵan GPC Investment aktıvteri maýsymnyń sońynda 363,6 mlrd teńgege baǵalandy. Al mindettemeleri 247,8 mlrd teńgeni quraıdy. Osylaısha, satýǵa jiktelgen taza aktıvter 115,8 mlrd teńgege baǵalanyp otyr, muny kompanıanyń quny dep esepteýge bolady.
GPC Investment zaýytty iske qospaǵanyna qaramastan, 2026 jyldyń birinshi jartyjyldyǵynyń qorytyndysy boıynsha 9,2 mlrd teńge paıda tapty. Ol 10 mlrd teńge kólemindegi oń baǵamdyq aıyrma esebinen qalyptasty.
Aıta keteıik, Qashaǵandaǵy zaýyttyń qurylysy is júzinde tek 2026 jyldyń jazynda bastaldy. Jobanyń EPC-merdigerleri, ıaǵnı jobalaý, jetkizý jáne qurylys kezeńderindegi tolyq sıkldi merdigerler retinde Qytaıdyń eki kompanıasy — China National Chemical Engineering Sixth Construction Company jáne China Wuhuan Engineering Corporation tańdaldy. Eki kompanıa da Qytaı ulttyq hımıalyq ınjenerlik korporasıasynyń (CNCEC) quramyna kiredi.