InfoHub Logo

Bir qasqyr tamaq izdep kele jatyp, qurýly turǵan qaqpanǵa túsip qalady. Olaı julqynyp, bulaı julqynyp, zorǵa qutylady. Qashyp bara jatqan qasqyrdy ańshylar kórip, artynan qýa jóneledi. Qasqyr sasqalaqtap bir eginshige kelip jaıyn aıtady:

         — Qaıtseń de meni jasyr, umytpaspyn jaqsylyǵyńdy. Meni qabyńa salyp, arqalap júre ber. Qasqyr jylap turǵan soń, eginshi qabyna salyp alyp, arqalap júre beredi. Keshikpeı ańshylar myltyǵyn jarqyldatyp jetip keledi.

         Kisiden:

         — Qashyp bara jatqan qasqyr kórmediń be? – dep suraıdy. Kisi:

         — Jańa bir qasqyr anaý mańaıdan qashyp ótti, tezirek umtylyńdar, – deıdi.

         Ańshylar bel asyp ketkennen keıin, eginshi qaptyń aýzyn sheship, qasqyrǵa:

         — Jónińe bara ber, maǵan da bir jaqsylyq etersiń, – deıdi. Qasqyr qýanyp eginshige:

         — Men seni jeımin, qarnym ashty, – dep tap-tap beredi. Eginshi baıǵus sasqalaqtap:

         — Aı, qasqyr, bunyń qalaı, men seni ólimnen qutqaryp alyp qalyp edim, jaqsylyqqa jamandyq ete me eken, olaı bolsa, bireýden tórelik suralyq, qaısymyzdiki jón eken, – deıdi.

         Ekeýi kerisip turǵanda, qańǵyryp bir jaǵynan túlki keledi. Bular túlkige oqıǵany bastan-aıaq aıtyp shyǵady.

         Túlki:

         — Joq sózdi aıtpańyzdar, menen basqa bireý estise, kúlip júrer, myna dorbaǵa úlken qasqyr syıady degenge nanbaımyn, baryp turǵan ótirik, – deıdi.

         Qasqyr men kisi:

         — Bul ras, – dep kerisip bolmaıdy. Túlki qasqyrǵa:

         — Qapqa kirmeı senbeımin, – deıdi. Qasqyr sendirmekshi bop qapqa kirgende, túlki eginshige:

         — Baıla qaptyń aýzyn, endi qımyldaıtyn keziń keldi. Qane, men kóreıin, kúzdigúni egindi qalaı soǵyp júrsiń? – deıdi.

         Eginshi quralyn alyp, qasqyrdy ura bastaıdy.

         Túlki:

         — Endi qaptyń aýzyn ash, – deıdi.

Qasekeń aldy-artyna qaramastan ata jóneledi. Artynan túlki:

         — Kópten beri istegen bir ádil tóreligim edi, – dep saq-saq kúlipti. Sóıtip, eginshi baıǵus túlkiniń aılasymen ajaldan qutylypty.

---