Bir Qasqyr sapar shekti elden jyraq,
Neshe kún tappaı azyq, qaldy jarap.
Jemtiktiń jaqyn jerde ıisin sezip,
Qasekeń kele jatyr soǵan qarap.
Qasqyrdyń kim bilmeıdi qomaǵaıyn,
Kóńilden, jemtik kórip, ketti ýaıym.
Keldi de bir súıekti saldy aýyzǵa
Shetinde bólegirek jatqan daıyn.
Kemirmeı, qalybynsha jutyp qaldy,
Tamaqta, júrmeı súıek, turyp qaldy.
Qaqalyp, dem ala almaı sasqanynan,
Alaqtap jan-jaǵyna kózin saldy.
Qaqaldy, súıek júrmeı tamaǵyna,
Bolmady ár túrli etken amalyna.
Janynan kúder úzip turǵan shaqta,
Kózine túspesin be jalǵyz Tyrna.
Tyrnany shaqyrady ısharatpen,
Mánisin baıandaýǵa jaıy ketken.
Oılaıdy: «Bu turǵanda til almas, - dep,
Kóńilin jumsatpasa aldap eppen».
Burynǵy myqtylyqty bylaı qoıyp,
Tyrnaǵa sóz sóıleıdi kishilikpen:
«Shyraǵym, dúnıede umytpaıyn,
Qutqarsań meni qazir osy dertten.
Tanysyp, senimenen dos bolmaqqa,
Júrýshi em kez kelgeı dep tilep kópten.
Bilýshi em ákeńdi de, Tyrna, seniń,
Dúnıede kim bar edi onan ótken?!
Ejelden olqylyq joq násilińde,
Kóz salyp qarap tursam arǵy túpten.
Balasy ataıynyń sen bir asyl,
Syrtyńnan júrmiz áli zor úmitpen.
Bile almaı ne qylaryn, sasqalaqtap,
Aldyńda aǵań otyr esi ketken.
Tyrnajan, ne qylsań da, endi óziń bil,
Aıdynnyń sarqyny ediń jurtqa jetken».
Tyrna estip myna sózdi, sýdaı tasty,
Qasqyrdyń tamaǵyna tyqty basty.
Sýyryp súıekti alyp tastap edi,
«Ýh!» dep qasqyr sonda kózin ashty.
Qutqarǵan zor báleden Tyrnasyna
Ol biraq kórsetpedi yqylasty.
Eńbegin ber dep Tyrna surap edi,
Qasekeń saý kúndegi ánge basty:
«Ne deısiń, oıyn ba osyń, shyn ba,
Tyrna, Qajaýǵa májnún joq saǵan munda.
Aqy alyp ózgelerden dándep qapsyń,
Qoı, Tyrnam, oınap meni áýre qylma!
Men saǵan olja bolar jeriń be edim,
Qutqardyń sózim syılap, erinbediń.
«Syıǵa - syı» degenmenen taz basyńdy
Aýzyma salyp turǵan kemirmedim.
Kórinbeı, joǵal shapshań, kózime endi,
Túsinip aıtqan dostyq sózime endi.
Ash bóri neshe kúndeı dám tatpaǵan,
Uıalmas tap berýge ózińe endi».
Tyrna esitip myna sózdi, jaman sasty,
Etpes dep Qasqyr olaı, oılamas-ty.
«Sadaqa bastan qulaq» degen maqal,
Beıshara, jan saýǵalap, tura qashty.

* * *
Qıssasy «Qasqyr, Tyrna» boldy tamam
Minezdes Qasqyrmenen keıbir adam.
Basyna bále túsip qysylǵanda,
Jalynyp-jalpaıady kelip saǵan.
Qutqaryp ol báleden jibergen soń,
Bolmaıdy oǵan kisi senen jaman.
Joq bolǵan otqa kúıip múlkińdeı-aq,
Qaıyryń zaıa keter etken oǵan.
Kisige opa bermes ondaı adam,
Qashyńyz ondaı jannan, kelse shamań.
Qasqyrǵa qaıyr istep Tyrna baıǵus,
Qýandy ketkenine ózi aman.
Qaıyrdy qarap iste adamyna,
Qaraılas ózińmenen shamalyǵa.
Qasqyrdaı qara júrek zalymdardyń
Júrmeńder túsip ketip tamaǵyna.

---