Qasıetpen qut darytqan Qyzylorda!

Qutty bolsyn aıtamyn bul toıyńa,
Qudiretti jınaǵansyń bar boıyńa,
Qyzylordam qasıetti qut mekenim,
Allamnyń syıy bergen syr boıyna.

Sen meniń shyrqalatyn shattyq únim,
Tek ózińde araılap atty kúnim,
Baqyttymyn ózińde týǵanyma,
Aqyndyqtyń aq sandyǵyn ashtym búgin.

Árbir atqan tańyma shattanamyn,
Shaıyrlardyń izimin dep maqtanamyn,
Óleń dese júregim elegizip,
Jyr - marjany kógime atty alaýyn.

Máńgilik meken etken Qorqyt babam,
Súleılerdi túletken saıran dalam,
Jer jánnáti ózińsiń ǵalamdaǵy,
Tek ózińnen týǵan jer baqyt tabam.

Syr eli ańyzdaǵy jyrdyń eli,
Jyraýlar kúmis kómeı dúl-dúl edi,
Sulý syrda boıjetken Roza apam,
Qazaqtyń erke qyzy, bul - bul edi.

Syrdyń eli qashannan da baǵaly,
Tuǵyrynan túletken el danany,
Ekinshi Abaı dep tanıdy myna álem
Syr súleıi, Turmaǵambet babany.

Aq kúrishti aq altyndy aımaǵym,
Óse bersin asqaqtasyn aıbaryń,
Birligińmen tatýlyǵyń bekem bop,
Sútteı uıyp, buzylmasyn qaımaǵyń.

Arý qalam Aqmeshitim astanam,
Mádenıettiń úlgisin sen bastaǵan,
Ana tildiń bıik ustap tuǵyryn,
Ata - saltyn árkez halqyń saqtaǵan.

Teń kelmeıdi ózińe kúmis, altyn,
Tileýińdi tileıdi barsha halqym.
Alashymnyń Uly anasy bir ózińsiń,
Álemge qanat jaıǵan ataq - dańqyń.

Sen meniń baılyǵymsyń sarqylmaıtyn,
Aıdyn - shalqar kólimsiń tartylmaıtyn,
Tarıhyń bar san ǵasyrlyq tunyp jatqan,
Tuńǵıyqqa batsam da taýsylmaıtyn.

Syr Alashtyń anasy bul qashannan,
Tarıhy bar tasqa oıyp qashalǵan,
Sensiń meniń Mekkem menen Medınam,
Jaratqannyń qudiretimen jasalǵan.

Qasıetpen qut darytqan Qyzylorda,
Tarıhyńdy tańbaladyń sara jolda,
Jasara ber, jaınaı ber máńgilikke,
Jaratqanym jar bolyp Allam qolda.