Keshegi qara kúnderde,
Juldyzsyz, aısyz túnderde,
Jol taba almaı sendelip,
Adasyp alash júrgende,
Bul kúngi kóp kósemder,
Suraımyn, sonda qaıda ediń?
Aqyl tappaı daǵdaryp,
Jan ashyr tappaı sandalyp,
Bararyn qaıda bile almaı,
Júrgen bir kúnde san ǵaryp -
Esepsiz kóp sheshender,
Jónińdi aıtshy qaıda ediń?
Saryarqa saıran jerlerim,
Kók oraı shalǵyn kólderim,
Bárin jaýǵa aldyryp,
Asqar taý - bıik beldeirim.
Qysylyp qazaq turǵanda,
Danyshpandar, qaıda ediń?
Atadan bala aırylyp,
Qanaty synyp qaırylyp,
Qasiret tolyp júrekke,
Turǵan bir kezde qaıǵyryp,
Tolyp jatqan qamqorlar,
Elde joq ediń, qaıda ediń?
Qulandaı úrkip elderiń,
Qaldyryp meken jerlerin,
Jaıaý, jalpy, jalańash,
Qatyn, bala, erleriń
Ashtyqtan kyrǵyn tapqanda,
Sypyra jomart, qaıda ediń?
Kedeıdiń soryn qaınatyp,
Maıdanǵa jasyn aıdatyp,
Til joq, kez joq, basshy joq,
Ólimge basyn baılatyp -
Jibererde, janym-aý,
Jan ashyr, jaqyn, qaıda ediń?
Endi búgin kim jaman?
Danyshpan emas, kim nadan?
Qamqor emes, kim jaýyz?
Jomart emes, kim sarań?
Kósem emes, kim jaltaq?
Sheshen emes joq adam.
Bári bilgish, bári de er,
Jetkizdiń, alla taǵalam.

---