Qazaqstandyq jańa fılmderdiń Kınopoıskidegi aıasyn keńeıtý máselesi Mádenıet jáne aqparat mınıstri Arman Qyryqbaev pen Yango Group bas dırektory Danııl Shýleıkonyń kelissózderiniń taqyrybyna aınaldy. Bul týraly Mádenıet jáne aqparat mınıstrligi habarlady, dep jazady infohub.kz saıty.
Kezdesý barysynda kınopremerlerdi aqparattyq qoldaý, sondaı-aq otandyq týyndylardy platformanyń taqyryptyq toptamalary men usynymdaryna qosý máseleleri talqylandy. Qazaqstandyq kınony sıfrlyq alańdarda ilgeriletý suhbattyń negizgi taqyryptarynyń birine aınaldy.
Sonymen qatar taraptar kreatıvti ındýstrıalar, sıfrlyq tehnologıalar, jasandy ıntellekt jáne bilim berý salasyndaǵy yntymaqtastyqty da sóz etti. Atap aıtqanda, qaraqshylyqpen kúres jáne avtorlyq quqyqty qorǵaý jónindegi zańnamalyq bastamalardy birlesip ilgeriletý, jasandy ıntellektti óner men kınoda qoldaný, kreatıvti ındýstrıalardy sıfrlyq transformasıalaý jáne zamanaýı sıfrlyq quzyretterdi damytý jaıy qozǵaldy.
Bilim berý salasynda Yandex Qazaqstan sarapshylary men tálimgerleriniń Kreatıvti ındýstrıalardy damytý qorynyń is-sharalaryna qatysý múmkindigi qarastyryldy.
Arman Qyryqbaev sondaı-aq Yandex Qazaqstan-nyń «Creative Qazaqstan» jobasynyń «Habar» jáne «Qazaqstan» telearnalarynda júzege asyrylyp jatqanyn atap ótti. Joba Qazaqstannyń zamanaýı kreatıvti ekonomıkasyna arnalǵan.
Kezdesý qorytyndysy boıynsha taraptar kıno, kreatıvti ındýstrıalar, jasandy ıntellekt, sıfrlyq bilim berý jáne qazaqstandyq kontentti ilgeriletý salasyndaǵy odan ári yntymaqtastyqqa múddeli ekenin rastady.
Buǵan deıin «Kýrsıv» qazaqstandyq komersıalyq kınonyń tildik qurylymy qalaı ózgergenin taldaǵan bolatyn: 2000-jyldary basym túrde orys tildi týyndylardan 2020-jyldardyń ortasyndaǵy tabysty qazaq tildi relızderge deıin. Sonyń bir mysaly — «Jumaqtan bılet»: fılm 2021 jyly orys tilinde túsirilip, 2026 jyly prokatqa shyǵar aldynda qazaq tiline qaıta dybystaldy.