Japonıada ótip jatqan XX jazǵy Azıa oıyndarynda erler arasyndaǵy shpagadan komandalyq týrnırde Qazaqstan quramasy jeńimpaz atandy. Komanda sapynda Rýslan Qurbanov, Kırıll Prohodov, Vadım Sharlaımov jáne Erlik Sertaı altyn medal ıelendi, dep habarlaıdy infohub.kz saıty.
Sheshýshi saıysqa deıingi jolda 2026 jylǵy álem chempıondary bolyp tabylatyn qazaq shpagashylary Qatar (45:27), Sıngapýr (45:36) jáne Gonkong (45:34) komandalaryn kezekpen utty.
Fınal qazaqstandyqtar úshin sátsiz bastaldy. Tórt saıystan keıin olar qarsylastarynan aıtarlyqtaı qalyp qoıdy — 10:19. Alaıda jeńiske degen qulshynys tanytyp, keremet kúsh-jigermen esepti teńestirip, keıin alǵa shyqty — 43:42. Nátıjesinde Azıadanyń eki dúrkin chempıondary (1994, 2002) úsh dúrkin chempıon atandy.
Azıa oıyndary-2026 shpagashylarynyń komandalyq týrnırindegi (27 qyrkúıek, semserlesý, shpaga, erler) qorytyndy oryn bólinisi bylaısha: birinshi oryn — Qazaqstan, ekinshi — Ońtústik Koreıa, úshinshi oryndy Gonkong pen Japonıa bólisti.
Qurmet tuǵyrynan bir qadam qalǵan jerde qazaq qylyshshy qyzdary toqtady. Qazaqstan quramasy Karına Dospaı, Aıgerim Sarybaı, Anastasıa Gýlık jáne Qaısha Jánibek quramynda Taılandty 45:32 esebimen jeńdi, biraq shırek fınalda Azıadanyń qojaıyndaryna — 40:45 esebimen jol berdi.
Osy týrnırge deıin Qazaqstan Azıadalarda semserlesýden úsh altyn, tórt kúmis jáne 13 qola medal jeńip alǵan. On tórtinshi qolany, Nagoıada, Artem Sarkısán jeńip aldy. On besinshisin — shpagashy qyzdar komandasy, on altynshysyn — qylyshshylar. Kırıll Prohodovtyń Azıa oıyndary-2026-daǵy medali besinshi kúmis boldy, al shpagashylar tórtinshi altyndy ıelendi.
XX jazǵy Azıa oıyndary resmı túrde 19 qyrkúıekte ashyldy jáne 4 qazanda aıaqtalady. 45 eldiń sportshylary qatysatyn jarystarda 460 medal jıyntyǵy sarapqa salynýda. Azıada-2026-da Qazaqstan quramasy sapynda 35 sport túrinen 558 sportshy óner kórsetýde.
Oıyndardyń birinshi kúni qazaqstandyqtar tórt altyn medal jeńip aldy. Chempıon atanǵandar: veloshabandozdar Rınata Sultanova men Alekseı Lýsenko, sondaı-aq karateshiler Jolaman Bıgabyl men Sofá Berýlseva. Quramanyń qorjynyna besinshi altyndy MMA saıyskeri Erkinǵalı Búrkitalın, altynshysyn — onyń aralas jekpe-jek komandasyndaǵy joldasy Qadyrbek Shynbaev qosty. 23 qyrkúıekte Lýsenko Azıada-2026-nyń eki dúrkin chempıony atandy. Segizinshi joǵary synaqtaǵy medaldi 24 qyrkúıekte eskekshiler Vladıslav Iakovlev pen Ivan Chernýhın erler arasyndaǵy jup eskekti qaıyqtar jarysynda jeńip aldy. Iasmına Toqsanbaeva búgin marafondyq júristen toǵyzynshy altyndy jeńip aldy.
Oıyndardyń jeti kúninen keıin Qazaqstan beıresmı medal esebinde besinshi orynda turdy.