29 shildede Qazaqstannyń basym bóliginde aýa raıy turaqsyz bolyp qalady: jańbyr men naızaǵaı, keı jerlerde burshaq, al birqatar óńirde aýa temperatýrasy +44 gradýsqa deıin kóteriledi, dep habarlaıdy infohub.kz.
Atmosferalyq fronttardyń ótýine baılanysty elimizdiń ońtústiginen basqa barlyq derlik aımaǵynda jańbyr men naızaǵaı kútiledi. Respýblıka boıynsha jeldiń kúsheıýi kútilse, ońtústik-batys pen ońtústikte keı jerlerde shańdy daýyl bolýy múmkin.
Eń ystyq aýa raıy Mańǵystaý oblysynda: +43…+44 gradýs. Atyraý, Aqtóbe jáne Qostanaı oblysynyń ońtústiginde aýa +40…+43 gradýsqa deıin jylıdy. Qyzylorda men Túrkistan oblysynda +40…+42 gradýs. Batys Qazaqstan, Qostanaı, Almaty, Aqmola, Qaraǵandy, Soltústik Qazaqstan, sondaı-aq Ulytaý jáne Jetisý oblystarynda termometr baǵandary +35…+38 gradýsqa kóteriledi.
Sınoptıkter birneshe óńirde órt qaýipiniń joǵary jáne tótenshe deńgeıde ekenin eskertedi. Eń kúrdeli jaǵdaı Qyzylorda, Jambyl, Atyraý, Túrkistan oblystarynda, sondaı-aq Jetisý, Qaraǵandy, Almaty, Shyǵys Qazaqstan, Pavlodar, Aqtóbe, Mańǵystaý, Qostanaı, Aqmola, Batys Qazaqstan, Abaı jáne Ulytaý oblystarynyń jekelegen aýdandarynda kútiledi.
Aqtóbe, Batys Qazaqstan, Soltústik Qazaqstan, Aqmola, Shyǵys Qazaqstan jáne Abaı oblystarynyń soltústiginde, shyǵysynda jáne batysynda naızaǵaı, burshaq, qatty jel (20–25 m/s deıin) kútiledi. Jetisý men Almaty oblysynyń taýly aýdandarynda qysqa merzimdi jańbyr men naızaǵaı, Shyǵys Qazaqstan oblysynda keı jerlerde qatty jańbyr jaýady. Mańǵystaý men Túrkistan oblystarynda shańdy daýyl bolady. Pavlodar, Qaraǵandy, Atyraý jáne basqa da birqatar óńirde qysqa merzimdi jańbyr, naızaǵaı jáne jeldiń kúsheıýi kútiledi.
Eldiń barlyq derlik óńirinde daýyldy eskertý jarıalandy. Turǵyndarǵa aýa raıy boljamyn eskerý, órt qaýipsizdigi sharalaryn saqtaý, qatty jel, naızaǵaı jáne tótenshe ystyqta abaı bolý usynylady.