Психоневрологиялық мекеме тұрғынының дәретханадан су ішіп жатқаны түсірілген бейнежазба Қазақстанның батысында жанжал тудырды, деп хабарлайды infohub.kz сайты.
Оқиға психоневрологиялық аурулары бар адамдарға арналған медициналық-әлеуметтік мекемелердің бірінде болған. Тараған кадрларда адам дәретханаға еңкейіп, одан су алып ішеді. Кадр сыртындағы ер адамның дауысы орталықта су мәселесі бар екенін, тұрғындар шөлдеп, тіпті өз зәрін ішуге дейін барғанын айтады. Оның сөзінше, мекеме қызметкері тұрғындардың ауыз суға еркін қол жеткізе алмайтынын мәлімдеген.
Мекеме әкімшілігі бұл ақпаратты мүлдем жоққа шығарды. Басшының айтуынша, қызметкерлердің бірі пациентті әдейі дәретханадан су ішуге көндірген — бұған жұмыс ішіндегі жанжал себеп болған. Енді мекемеге тексеріс жүргізіледі, ал оның директоры бейнежазба түсірген қызметкерге қатысты арыз берді.
«Бұл ақпарат шындыққа сәйкес емес. Мекемеде ауыз суға қол жеткізуде ешқандай мәселе жоқ. Орталықтандырылған сумен жабдықтау жұмыс істейді, қосымша сүзгілер орнатылған. Мен қамқоршы ретінде уәкілетті органдарға арыз жаздым. Олар менің қызмет алушымның құқығын бұзатын әрекеттер жасалған бейнежазбаны түсірген қызметкермен айналысады», — деді Дарьин арнайы әлеуметтік қызметтер көрсету орталығының директоры Нұржан Әткешов.
Жарияланымның дереккөзі — КТК телеарнасы.