Qazaqstanda jazǵy maýsym qarsańynda 78 balalar saýyqtyrý lagerinde órt qaýipsizdigi talaptarynyń 756 buzýshylyǵy anyqtaldy. Bul týraly balalardyń jazǵy demalysyn uıymdastyrý jónindegi respýblıkalyq shtabtyń otyrysynda habarlandy, dep málim etedi infohub.kz.
Tótenshe jaǵdaılar mınıstrliginiń dereginshe, TJM jáne ákimdikterdiń birlesken tekseristeri 220 balalar lagerin qamtydy. Anyqtalǵan buzýshylyqtar órt qaýipsizdigi erejeleriniń saqtalmaýyna baılanysty.
Otyrystyń negizgi taqyryby balalardyń jazǵy demalysy kezindegi qaýipsizdigin qamtamasyz etý boldy. Oqý-aǵartý mınıstri Juldyz Súleımenovanyń aıtýynsha, bıyl jazda 3,2 mıllıonnan astam bala demalyspen qamtylǵan. Onyń ishinde 116 myńnan astamy 176 jyldyq jáne maýsymdyq ortalyqtarda saýyqtyrylsa, taǵy 3,1 mıllıonnan astamy mektep janyndaǵy lagerler men qosymsha bilim berý uıymdaryna barady.
Úkimette bilim berý jáne saýyqtyrý qyzmetterin kórsetetin uıymdardy mindetti lısenzıalaýdyń alǵashqy qorytyndylary shyǵaryldy. Jańa tártip alǵash ret qoldanylyp otyr jáne qaýipsizdikke, kadr quramyna, tamaqtandyrýdy uıymdastyrýǵa, medısınalyq súıemeldeýge jáne demalys baǵdarlamalarynyń mazmunyna biryńǵaı talaptardy kózdeıdi. Qazirgi tańda 64 ortalyq lısenzıa alsa, taǵy 45 ótinish qaraýda.
Sonymen qatar, densaýlyq saqtaý mınıstrliginiń málimetinshe, sanıtarlyq-epıdemıologıalyq qorytyndy alýǵa 189 ótinish kelip túsken. Onyń ishinde 180 nysan oń qorytyndy aldy. Ruqsat berilmes buryn mamandar lagerlerdiń sanıtarlyq talaptarǵa sáıkestigin tekseredi, onyń ishinde aýyz sýdy, baseınderdegi sýdy, topyraqty jáne jaǵajaılardaǵy qumdy zerthanalyq zertteýler de bar.
Otyrysqa qatysýshylar jazǵy saýyqtyrý naýqanynyń alǵashqy aptalarynda oryn alǵan tótenshe oqıǵalardy da talqylady. Úkimettiń málimdeýinshe, barlyq jaǵdaıda memlekettik organdar is-qımyldy ýaqtyly úılestirip, balalar qaýipsiz jerlerge jedel kóshirilip, qajetti medısınalyq súıemeldeý aldy.
Otyrys qorytyndysy boıynsha vıse-premer – mádenıet jáne aqparat mınıstri Aıda Balaeva demalys kezeńinde balalardyń qaýipsiz minez-qulqy máseleleri boıynsha halyqpen aqparattyq jumysty kúsheıtýdi, sondaı-aq sanıtarlyq-epıdemıologıalyq, órtke qarsy jáne qoǵamdyq baqylaýdy qatańdatýdy tapsyrdy. Onyń aıtýynsha, anomaldy ystyq aýa raıy jaǵdaıynda balalardyń qaýipsizdigine erekshe kóńil bólý qajet, onyń ishinde lagerlerdegi tamaq sapasyn turaqty monıtorıńteý de bar.