2026 jylǵy 14 tamyzda Qazaqstanda segiz óńirdi qamtyǵan iri energıa júıesindegi aqaý oryn aldy. Tehnologıalyq buzylys saldarynan Almaty, Jambyl, Túrkistan, Qyzylorda, Qaraǵandy, Abaı oblystarynyń, sondaı-aq Jetisý jáne Ulytaý oblystarynyń tutynýshylary jaryqsyz qaldy... dep habarlaıdy infohub.kz saıty.
KEGOC kompanıasynyń baspasóz qyzmetiniń málimetinshe, oqıǵa Astana ýaqytymen saǵat 14:37-de bolǵan. Sebep — Qyrǵyzstandaǵy Toqtogúl sý elektr stansasyndaǵy eki gıdrogeneratordyń ajyraýy. Bul Qazaqstannyń Biryńǵaı energıa júıesindegi «Soltústik-Shyǵys-Ońtústik» tranzıtiniń shamadan tys júktelýine jáne Ońtústik aımaqtyń Qazaqstannyń BEJ-inen jáne Ortalyq Azıanyń birikken energokesheniniń (Qyrǵyzstan, Ózbekstan, Tájikstan) energıa júıelerinen bólinip qalýyna ákeldi.
Saldarynan avarıaǵa qarsy avtomattandyrý iske qosylyp, atalǵan óńirlerdegi tutynýshylar ajyratyldy. Elektrmen jabdyqtaýdy qalpyna keltirý birden bastaldy: saǵat 14:47-de KEGOC Qaraǵandy, Abaı oblystary men Ulytaý oblysynda elektr qýatyn tolyq qalpyna keltirdi. Saǵat 16:26-da Almaty oblysy men Jetisý oblysyna, al 16:34-te Jambyl, Túrkistan jáne Qyzylorda oblystaryna elektr qýaty qaıtaryldy.
Tehnologıalyq buzylystyń sebepterin anyqtaý úshin arnaıy komısıa quryldy. Qazaqstan Energetıka mınıstrliginiń málimetinshe, oqıǵanyń sebebi — Ortalyq Azıa energıa júıesi tarapynan elektr qýaty aǵynynyń kúrt ózgerýinen týyndaǵan energıa júıesindegi qýattyń artýy.