Qazaqstannyń dzúdo quramasy Azıada-2026 aralas komandalyq týrnırinde kúmis júldeger atandy. Fınalda otandastarymyz Japonıa quramasyna 0:4 esebimen jol berdi. Bul — qazaqstandyq dzúdoshylardyń atalǵan oıyndardaǵy jetinshi medali, dep habarlaıdy infohub.kz saıty.
Fınaldyń alǵashqy beldesýinde Gýsman Qyrǵyzbaev (73 kg) japonıalyq Tasýkı Isıharamen kezdesti. Kezdesý tórt mınýtqa sozylyp, Isıhara «ıýko» baǵasynyń arqasynda jeńiske jetti.
Ekinshi beldesýde Ajar Asqat (70 kg) tatamıde Ýtana Teradamen sheberlik baıqasty. Japonıalyq sportshy kezdesýdi 3 mınýt 7 sekýndta «ıpponmen» aıaqtady.
Úshinshi beldesýde Aıdar Arapov (90 kg) Hıdetosı Tokýmotıge qarsy aldymen «ıýko» aldy, alaıda keıin qazaqstandyq úsh «shıdo» jınap, jeńis japonıalyq dzúdoshyǵa «ıpponmen» berildi.
Tórtinshi bolyp tatamıge Aıda Toıshybekova (78 keliden joǵary) shyqty. Onyń qarsylasy Mıkı Mýkýnokı 33 sekýndta «ıpponmen» jeńdi.
Osylaısha, Qazaqstan quramasy Azıada-2026 dzúdo týrnırin jeti júldemen aıaqtady: bes kúmis jáne eki qola. Jekeleı synda qazaqstandyqtar tórt kúmis pen eki qola aldy, sodan keıin aralas komandalyq týrnırde kúmis medal qosty.
Kúmis júldegerler: Eldos Smetov (60 kg), Abıba Ábýjakynova (48 kg), Ádilet Almat (81 kg), Ajar Asqat (70 kg) jáne Qazaqstannyń aralas quramasy.
Qola medaldar: Esmıgýl Kýıýlova (63 kg) jáne Ekaterına Tokareva (78 kg).
Taǵy bes qazaqstandyq sportshy jeke podıýmǵa bir qadam jetpeı toqtady: Gýsman Qyrǵyzbaev, Merýert Sarsenova, Dana Abdırova, Marat Baıkamýrov jáne Aıda Toıshybekova óz salmaqtarynda besinshi oryn aldy.
Japonıadaǵy XX Jazǵy Azıa oıyndary 19 qyrkúıekte resmı túrde ashyldy. 45 eldiń sportshylary qatysatyn jarystarda 460 medal jıyntyǵy sarapqa salynady. Azıada-2026-da Qazaqstan quramasynyń quramynda 35 sport túrinen 558 sportshy synǵa túsýde.