Qazaqstan Qorǵanys mınıstrligi halyqqa áskerı kolonnalardyń el aýmaǵynda qozǵalýyna alańdamaýdy surap, úndeý jasady, dep habarlaıdy infohub.kz saıty.
Vedomstvonyń Telegram-arnasynda tamyz jáne qyrkúıek aılarynda Qazaqstanda «Batyl toıtarys - 2026» strategıalyq komandalyq-shtabtyq oqý-jattyǵýy ótetini habarlandy. Osyǵan baılanysty el aýmaǵynda qarý-jaraq, áskerı tehnıka jáne jeke quramdy jaýyngerlik daıarlyq is-sharalary ótetin aýdandarǵa jyljytý júzege asyrylady.
«Áskerdi tasymaldaý aralas tásilmen júzege asyrylady: temirjol eshelondarymen, jalpy paıdalanymdaǵy joldarmen avtomobıl kolonnalarymen, sondaı-aq fronttyq jáne armıalyq avıasıany paıdalaný arqyly», — dep naqtylady vedomstvoda.
Atap ótilgendeı, ótkizilip jatqan is-sharalar josparly sıpatta jáne áskerlerdiń jaýyngerlik daıarlyǵyn jetildirýge, áskerı basqarý organdarynyń, ásker túrleri men tekteriniń, arnaıy áskerlerdiń ózara is-qımyl deńgeıin arttyrýǵa, sondaı-aq Qarýly kúshterdi qoldanýdyń zamanaýı nysandary men tásilderin pysyqtaýǵa baǵyttalǵan.
«Oqý-jattyǵý barysynda qurlyqta, áýe keńistiginde, teńizde jáne kıberkeńistikte biryńǵaı operasıalyq keńistikte áskerlerdi qoldaný jáne vedomstvoaralyq ózara is-qımyldy uıymdastyrý máseleleri pysyqtalatyn bolady», — dep qosty mınıstrlikte.
Osyǵan baılanysty azamattardan sabyr saqtaýdy, tek resmı aqparatqa súıenýdi jáne tekserilmegen málimetterdi taratpaýdy suraıdy.