Qazaqstanda respýblıkalyq jáne oblystyq mańyzdaǵy 40 myń km-den astam avtomobıl jolyn mobıldi baılanyspen qamtý josparlanyp otyr. Ol úshin trassalarda 500-den astam antena-machta qurylǵylary men bazalyq stansıalar salynady, dep habarlaıdy infohub.kz saıty.
Jobanyń iske asyrylý barysy premer-mınıstrdiń orynbasary — jasandy ıntellekt jáne sıfrlyq damý mınıstri Jaslan Mádıevtiń tóraǵalyǵymen ótken keńeste talqylandy. Talqylaýǵa «Transtelekom» AQ jáne mobıldi operatorlardyń ókilderi qatysty.
Keńes qatysýshylary telekomýnıkasıalyq ınfraqurylym qurylysynyń aǵymdaǵy jaı-kúıin, sondaı-aq ınvestor men baılanys operatorlarynyń salynyp jatqan nysandardy birlesip paıdalaný máselelerin qarastyrdy.
Avtomobıl joldarynda turaqty radıojabyndy qamtamasyz etýge jáne jobaǵa qatysýshylar arasyndaǵy jumystardy úılestirýge erekshe nazar aýdaryldy.
Respýblıkalyq trassalardy mobıldi baılanyspen qamtý 2026 jyldyń sońyna deıin, oblystyq joldardy — 2027 jyldyń sońyna deıin aıaqtalýy josparlanyp otyr.
Jobany «Transtelekom» AQ qarjylandyrady. Ony iske asyrý úshin búdjettik qarajat tartý josparlanbaǵan.
Buǵan deıin «Kýrsıv» jazǵandaı, Sıfrlyq damý mınıstrligi men «Transtelekom» AQ Qazaqstannyń respýblıkalyq jáne oblystyq trassalaryn ınternetpen qamtýǵa kelisken bolatyn. Ol úshin turaqty baılanysy joq ýchaskelerdi — «aq daqtardy» anyqtap, qajetti telekomýnıkasıalyq ınfraqurylym salý josparlanǵan edi.