Qazaqstanda balabaqshalar, mektepter men kolejderge arnalǵan jeke qaýipsizdik sabaqtarynyń mazmuny jańartyldy. Baǵdarlamaǵa beıtanys adamdarmen qarym-qatynastan bastap ınternet-alaıaqtyqqa deıingi 140-tan astam taqyryp engizildi, dep habarlaıdy infohub.kz saıty.
Oqý-aǵartý mınıstrliginiń málimetinshe, taqyryptar jasyna qaraı tańdalǵan. Mektepke deıingi balalarǵa adasyp qalǵan jaǵdaıda kimge júginý kerektigi jáne beıtanys adamdarmen qalaı ustaý kerektigi túsindiriledi. Bastaýysh synyp oqýshylary jeke shekaralardy, kúdikti siltemelerdi jáne órt kezindegi evakýasıa erejelerin úırenedi.
«Jasóspirimderge býllıng pen kıberbýllıng, ınternet-alaıaqtyq, derbes derekterdi qorǵaý, jalǵan jańalyqtar, dıpfeıkter jáne jasandy ıntellektini qaýipsiz paıdalaný taqyryptary qarastyrylǵan. Sondaı-aq qysym kórsetý, bopsalaý, qorqytyp alý jáne qadaǵalaý jaǵdaılary talqylanady», — delingen vedomstvo habarlamasynda.
Sonymen qatar Oqý-aǵartý mınıstrliginiń aqparaty boıynsha, joǵary synyp oqýshylary men kolej stýdentteri «ońaı aqsha» sqemalaryn jáne dropperstvony — aqsha aýdarý úshin bóten adamnyń bank kartasyn nemese shotyn paıdalanýdy taldaıdy. Basqa taqyryptar qatarynda eńbek alaıaqtyǵy, ınternettegi qaýipti tanysýlar, manıpýlásıalar jáne jastardy quqyqqa qaıshy áreketterge tartý áreketteri bar.
Sabaqtar aptasyna bir ret ótedi jáne synyp nemese kýrator saǵatynyń 10 mınýtyn alady.
«Balalar naqty ómirlik jaǵdaılardy taldap, qaýipti tanýdy, ózin qorǵaýdy jáne kómekke kimge júginý kerektigin túsinýdi úırenedi», — dep túsindirdi mınıstrliktiń baspasóz qyzmeti.
Jańa taqyryptardy vedomstvo IýNISEF jáne beıindi memlekettik organdarmen birlesip daıyndady.
Buǵan deıin «Kýrsıv» Qazaqstanda 2-11 synyp oqýshylary jańa erejeler boıynsha baǵalanatynyn jazǵan bolatyn. Qazaqstandyq mektepterdiń 2–4 synyptarynda dástúrli BJB men TJB alyp tastaý josparlanýda. Olardyń ornyna qalyptastyrýshy baǵalaý, sondaı-aq taqyryptyq jáne qorytyndy baqylaý jumystary engizilýde.
Sonymen qatar, mektepterde BJB men TJB joıylǵannan keıingi alǵashqy bilim tekserý bastaldy.