«Qazgıdromet» meteorologıalyq qyzmeti qazan aıyna arnalǵan aýa raıynyń konsýltatıvtik boljamyn jarıalady: aıdyń alǵashqy kúnderindegi qysqa merzimdi sýyqtan keıin Qazaqstanǵa jyly aýa raıy qaıta oralady, dep habarlaıdy infohub.kz saıty.
Jalpy, boljam boıynsha, qazan aıy jyly ári jaýyn-shashyn mólsheri qalypty bolady.
Meteorologıalyq qyzmettiń málimetinshe, qazannyń basynda el boıynsha aýa temperatýrasynyń negizgi fony +15...+25 gradýs shamasynda bolady. Sodan keıin Soltústik sıklonnyń áserinen respýblıkanyń búkil aýmaǵynda jańbyr men qar túrindegi jaýyn-shashyn jaýady, jel kúsheıip, ekpini 15-28 m/s jetedi, soltústik jartysynda tómengi burqasyndar bolýy múmkin.
Arktıkalyq aýa massalarynyń enýimen tuman, kóktaıǵaq qubylystary jáne aıaz bolýy yqtımal. Aıtarlyqtaı sýytady, biraq uzaqqa emes: eldiń batysy men soltústik-batysynda túnde -6...+5, kúndiz +2...+11 gradýs; soltústikte, shyǵysta jáne ortalyqta túnde -1...-6, kúndiz 0...+8 gradýs; respýblıkanyń ońtústigi men ońtústik-shyǵysynda túnde 0...+5°S, kúndiz +10...+15, taýly aýdandarda túnde -2...-10, kúndiz +5...+10 gradýs.
Birinshi onkúndiktiń ekinshi jartysynda Orta Azıa men Jerorta teńiziniń shyǵys jaǵalaýynan jyly aýa massalarynyń kelýimen eldiń basym bóliginde kúndizgi temperatýra +15...+20-ǵa, ońtústik-batysta jáne ońtústik jartysynda +18...+28 gradýsqa deıin kóteriledi.
Qazannyń ekinshi jáne úshinshi onkúndikterinde temperatýralyq fonnyń aýytqýy boljanady: batys jáne soltústik-batys óńirlerde túnde +5...+12-den -5...+5-ke deıin, kúndiz +18...+28-den +10...+20 gradýsqa deıin; eldiń soltústiginde, ortalyǵynda jáne shyǵysynda túnde +3...+8-den -1...-8-ge deıin, kúndiz +15...+23-ten +3...+13 gradýsqa deıin; ońtústik jartysynda túnde +5...+10-nan -3...+5-ke deıin, kúndiz +15...+23-ten +20...+30-ǵa deıin, keıbir kezeńderde temperatýralyq fon túnde -1...-6, kúndiz +10...+15 gradýs bolady.
Boljamǵa sáıkes, jalpy qazan aıynda aılyq ortasha aýa temperatýrasy respýblıkanyń basym bóliginde normadan 1-2 gradýsqa joǵary, Shyǵys Qazaqstan oblysynda, Pavlodar oblysynyń soltústik-shyǵys jartysynda jáne Abaı oblysynda normaǵa jýyq bolady. Jaýyn-shashyn mólsheri respýblıkanyń basym bóliginde klımattyq normaǵa jýyq boljanady.