Qazaqstannan keletin kólikterdiń shekaradan ótý ýaqyty aıtarlyqtaı qysqarýy múmkin: reseılik parlamentarıler kólik quraldaryn tekserýge naqty normatıvter belgileýdi usyndy, dep habarlaıdy infohub.kz saıty.
Reseı Federasıasy Memlekettik Dýmasynyń kólik ınfraqurylymyn damytý jónindegi komıtet tóraǵasynyń orynbasary Iýrı Grıgorev ótkizý pýnktterinde jeńil kólikter men avtobýstardy tekserý ýaqytyn úsh mınýtpen, al júk kólikterin on mınýtpen shekteý týraly bastama kóterdi. Onyń aıtýynsha, shekarada uzaq kútý saıahatshylardyń jaılylyǵyna ǵana emes, shekaralas aımaqtardyń ekonomıkasy men logıstıkasyna da keri áserin tıgizýde.
«Jeńil kólikter men týrısik avtobýstar úshin — úsh mınýtqa deıin, júk kólikteri úshin — 10 mınýtqa deıin. Bul jaı tilek emes, qol jetkizýge bolatyn jáne qol jetkizýge tıis naqty maqsat», — dep atap ótti depýtat.
Rásimderdi jyldamdatý úshin Grıgorev sıfrlyq servıster men bıometrıalyq tehnologıalardy belsendirek engizýdi usynyp, áýejaılardaǵy baqylaýdy uıymdastyrýmen salystyrdy.
Sonymen qatar, shekara ótkelderine baratyn joldarda kópfýnksıonaldy qyzmet kórsetý aımaqtaryn qurý josparlanýda, onda jeńil jáne júk kólikterine arnalǵan turaqtar, medısınalyq pýnktter, demalys bólmeleri, kafeler men asqanalar, sondaı-aq dýsh kabınalary men dárethanalar ornalasady.
Parlamentarı sondaı-aq qoldanystaǵy shekara ótkelderin jańǵyrtyp, olardy zamanaýı jabdyqtarmen jaraqtandyrýǵa shaqyrdy.
Buǵan deıin «Kýrsıv» Qazaqstan úkimetiniń Reseımen shekaradaǵy jaǵdaıǵa aralasqanyn habarlaǵan bolatyn.