Qazaqstan Syrtqy ister mınıstrligi Qara teńiz akvatorıasynda 17 jáne 19 shildede bolǵan azamattyq kemelerge jasalǵan ushqyshsyz ushaq shabýyldaryn qatań aıyptady. Bul kemeler Kaspı qubyr konsorsıýmynyń ınfraqurylymy arqyly munaıdy zańdy tasymaldaýǵa qatysty, dep habarlaıdy infohub.kz saıty.
Vedomstvo málimdemesinde Qazaqstan mundaı shabýyldardy eldiń ekonomıkalyq múddelerine jol berilmeıtin qolsuǵýshylyq, sondaı-aq zańdy halyqaralyq saýda, álemdik energetıkalyq naryqtar men jahandyq kólik-logıstıkalyq jetkizý tizbekteriniń qaýipsizdigin turaqsyzdandyrýǵa baǵyttalǵan áreketter dep baǵalaıtyny atap ótildi.
"Bizdiń erekshe alańdaýshylyǵymyzdy týdyratyny – Qara teńiz akvatorıasyna KTK termınaldarynda munaı tıeý maqsatynda kiretin azamattyq kemeler týraly aqparat almasýdyń buryn barlyq múddeli taraptar kelisken tetigi ádeıi elenbeı qaldy, bul azamattyq kemeler ekıpajdarynyń ómiri men qaýipsizdigine qater tóndirdi", – delingen málimdemede.
SİM Qazaqstan shabýyldardy dereý toqtatýdy jáne qazaqstandyq kómirsýtek shıkizatyn eksporttaý ınfraqurylymynyń qaýipsizdigin qamtamasyz etý úshin tolyq sharalar qabyldaýdy talap etetinin jetkizdi.
Sonymen qatar, respýblıka seriktes elderdi bolǵan shabýyldardy qatań aıyptaýǵa shaqyrdy jáne barlyq múddeli taraptardy osyndaı oqıǵalardyń aldyn alý boıynsha praktıkalyq sharalar ázirleýge shaqyrdy. Vedomstvo tek halyqaralyq quqyq normalaryn qatań saqtaý ǵana mundaı jaǵdaılardyń qaıtalanýyna jol bermeıtinin atap ótti.
"Qazirgi ýaqytta Qazaqstan Respýblıkasy keltirilgen zalaldy jan-jaqty baǵalaýdy júrgizip jatyr. Onyń qorytyndysy boıynsha Qazaqstan halyqaralyq quqyqta kózdelgen óz zańdy múddelerin qorǵaýdyń barlyq tetikterin, onyń ishinde keltirilgen zalaldy óteý týraly talaptar qoıýdy qoldaný quqyǵyn ózinde saqtap qalady", – dedi SİM-de.
Mınıstrlik sondaı-aq Qazaqstannyń janjaldardy beıbit jolmen retteýge, halyqaralyq quqyq qaǵıdattaryna, keme júzý erkindigine jáne halyqaralyq kólik-logıstıkalyq jáne energetıkalyq baǵyttardyń senimdi jumys isteýin qamtamasyz etýge adaldyǵyn rastady.
Buǵan deıin 19 shildede Kaspı qubyr konsorsıýmy teńiz termınalynyń VPÝ-1 jáne VPÝ-3 syrtqy aılaq qurylǵylarynda munaı tıeý kezinde eki munaı tankeri ushqyshsyz ushaq shabýylyna ushyraǵany habarlandy. Sondaı-aq 17 shildede KTK termınalyna qazaqstandyq munaıdy tıeý úshin barǵan Nordic Zenith munaı tankeri de ushqyshsyz ushaq soqqysyna ushyrady.