Qazaqstanda jaraqat kezinde kómek kórsetý júıesi keńeıtilýde. Densaýlyq saqtaý mınıstrliginiń baǵdarlamasy óńirlerde travmatologıalyq ortalyqtar jelisin keńeıtýdi jáne trassalar men týrısik aımaqtarda shuǵyl kómekti kúsheıtýdi kózdeıdi, dep habarlaıdy infohub.kz saıty.
Mınıstrliktiń málimetinshe, elde travmatologıalyq ortalyqtar jelisin 2027 jylǵa deıin qurý josparlanýda, sondaı-aq shokqa qarsy bólimshelerdi jańartý kózdelýde.
Mundaı ortalyqtar Astana, Almaty, Qaraǵandy jáne Balqash qalalarynda ashylǵan. Endi jelini keńeıtý týraly sheshim qabyldandy.
Sonymen qatar, qabyldaý bólimshelerindegi 210 shokqa qarsy kabınetti zamanaýı Trauma room-ǵa qaıta jaraqtandyrý, avtojoldardyń qaýipti ýchaskelerinde 69 tirek medısınalyq pýnktin jáne týrısik aımaqtarda 60 maýsymdyq medısınalyq pýnkt qurý josparlanýda.
«Jol-kólik, turmystyq jáne balalar jaraqattanýynyń aldyn alý jumystary kúsheıtiledi, sondaı-aq halyqqa alǵashqy kómek kórsetý daǵdylaryn úıretý keńeıtiledi», – delingen habarlamada.
Qazirgi ýaqytta mamandandyrylǵan kómekti 1,5 myńnan astam travmatolog-dáriger kórsetedi. Respýblıkada 81 travmpýnkt, 4 myńnan astam mamandandyrylǵan tósek-oryn jáne 260 medısınalyq uıym jumys isteıdi.
Buǵan deıin «Kýrsıv» Astanada jańa balalar travmpýnkti ashylǵannan beri myńdaǵan pasıent qabyldaǵanyn jazǵan bolatyn. Aǵymdaǵy jyldyń aqpan aıynda ashylǵannan keıin bes aı ishinde munda 6 740 kishkentaı pasıent qabyldandy.
Odan buryn Almatyda kanıkýl kezinde belsendi demalysqa baılanysty balalar jaraqatynyń kóbeıetini habarlanǵan. Balalar shuǵyl medısınalyq kómek ortalyǵynyń travmatolog-ortopedi Baqyt Qojahanovtyń aıtýynsha, ol jumys isteıtin travmpýnktke kún saıyn ártúrli jaraqatpen 300-ge deıin bala júginedi.