2026 jyldyń birinshi jartyjyldyǵynda Qazaqstanda týa bitken aqaýymen dúnıege kelgen balalar sany 25,6%-ǵa azaıdy. Densaýlyq saqtaý mınıstrligi bul oń ózgeristi prenataldyq skrınıngtiń damýymen baılanystyryp otyr, dep habarlaıdy infohub.kz saıty.
Mınıstrliktiń málimetinshe, búginde elimizde perınataldyq ortalyqtar bazasynda 22 «Bir kúndik klınıka» jumys isteıdi. Aǵymdaǵy jyldyń alty aıynda olarda 66 myń júkti áıel alǵashqy skrınıngten ótti.
«Mundaı format táýekelderdi ýaqytyly anyqtaýǵa jáne qajet bolǵan jaǵdaıda bolashaq analardy qosymsha tekserýge jiberýge múmkindik beredi», – deıdi vedomstvo ókilderi.
Esepti kezeńde últradybystyq zertteý kezinde uryqtyń týa bitken aqaýlaryn anyqtaý 13,8%-ǵa ósti, al týa bitken aqaýlarmen jáne hromosomalyq buzylystarmen týǵan balalar sany 25,6%-ǵa qysqardy.
Densaýlyq saqtaý mınıstrliginiń bas genetıgi Gúlshara Ábildınovanyń aıtýynsha, oń dınamıka júrgizilgen prenataldyq dıagnostıkanyń nátıjeleri boıynsha baıqalady.
«Bir kún ishinde júkti áıel bıohımıalyq prenataldyq skrınıngten ótip, Daýn sındromyna kúdik týdyratyn zattardyń konsentrasıasyn anyqtaı alady. Sol kúni ol ÝDZ-dan ótip, genetık dárigerdiń keńesin alady», – dep túsindirdi profesor.
Joǵary nemese shekti táýekel anyqtalsa, júkti áıelge ınvazıvti prenataldyq dıagnostıkadan ótý usynylady.
Densaýlyq saqtaý mınıstrligi Qazaqstannyń «Bir kúndik klınıkalardy» damytý tájirıbesi Ortalyq Azıa elderinde joǵary baǵalanǵanyn atap ótti. Endi Qyrǵyzstan, Ózbekstan jáne Tájikstan osy ádistemeni óz elderinde engizýdi josparlap otyr.
Buǵan deıin Densaýlyq saqtaý mınıstrligi respýblıkadaǵy perzenthanalardaǵy tekserý qorytyndysyn shyǵarǵan bolatyn. Kópshiliginde zańbuzýshylyqtar anyqtaldy.