Qazaqstanda zamanaýı sıfrlyq tehnologıalardy engizý arqyly jol qozǵalysyn baqylaý aıtarlyqtaı kúsheıtildi. Endi tártip saqshylaryna ushqyshsyz ushatyn apparattar, mobıldi keshender jáne ortasha jyldamdyqty baqylaý júıeleri kómekke keldi, dep habarlaıdy infohub.kz saıty.
İshki ister mınıstrliginiń aqparattyq medıaportalynda atap ótilgendeı, ınovasıalyq ázirlemeler polısıa qyzmetkerlerine jol qozǵalysy erejeleriniń buzylýyn tıimdi anyqtaýǵa, qaýipti jaǵdaılarǵa jedel den qoıýǵa jáne jol-kólik oqıǵalarynyń aldyn alýǵa múmkindik beredi. Vedomstvo: «Búginde qoǵamdyq tártipti qamtamasyz etý sıfrlyq quraldardy engizýmen júzege asyrylýda. Azamattarǵa jedel kómek kórsetý jáne den qoıý mańyzdy. Sondyqtan azamattardy qylmystyq qol suǵýshylyqtan qorǵaý ádisteri men nysandary, sondaı-aq jol qaýipsizdigin qamtamasyz etý salasyndaǵy tásilder kún saıyn jetildirilýde. Sıfrlyq sheshimder quqyq buzýshylardy anyqtaýǵa jáne olardy jaýapkershilikke tartýǵa yqpal etedi», — dep atap ótti.
Ushqyshsyz ushatyn apparattar jol qozǵalysyn áýeden úzdiksiz baqylaýdy qamtamasyz etedi. Osynyń arqasynda jyldam júrý áýesqoılary men qasaqana ereje buzýshylar endi jaýapkershilikten qutyla almaıdy — buzýshylyqtar bıiktikten tirkeledi. Degenmen, drondardy qoldanýdyń basty maqsaty — jazalaý emes, qaýipti jaǵdaılarǵa ýaqytyly den qoıý arqyly qazaqstandyqtardyń ómiri men densaýlyǵyn saqtaý.
Polısıanyń taǵy bir tıimdi kómekshisi — patrúldik kólikterge ornatylǵan mobıldi keshender. Olar kólik aǵynynda rúlde uıaly telefondy paıdalaný, jaıaý júrginshilerge jol bermeý, jyldamdyqty arttyrý jáne manevr jasaý erejelerin saqtamaý sıaqty buzýshylyqtardy ońaı anyqtaýǵa múmkindik beredi.
Qala syrtyndaǵy trassalarda jyldamdyqty arttyrýdy unatatyndar úshin ortasha jyldamdyqty baqylaý júıesi qoldanylady. Ol kólik quralynyń búkil jol boıyndaǵy qozǵalysyn taldaıdy. Qazir mundaı júıe respýblıkalyq mańyzy bar 12 negizgi baǵytta engizilgen, dep naqtylady İİM.
Apattylyqtyń aldyn alý maqsatynda túngi ýaqytta, rúlde uıqyshyldyqty sezinetin júrgizýshiler úshin, sondaı-aq qolaısyz aýa raıy jaǵdaıynda erekshe ózekti bolyp tabylatyn lazerlik júıeler de qoldanylady.
«Sıfrlyq tehnologıalarmen qatar joldarda júrý bóligin jasandy taryltý boıynsha jumys júrgizip jatyrmyz. Bul júrgizýshilerdiń jyldamdyq rejımin tómendetýi, zeıinin arttyrýy jáne jınaqy túrde qozǵalysty jalǵastyrýy úshin jasalýda. Barlyq osy sharalar azamattardy qorǵaýdy kúsheıtýge, sondaı-aq joldardaǵy apattylyq deńgeıin tómendetýge baǵyttalǵan. Óıtkeni biz úshin júrgizýshiler men jolaýshylardyń jolǵa shyqqanda óz qaýipsizdigine senimdi bolýy mańyzdy», — dep atap ótti İİM ákimshilik polısıa komıteti tóraǵasynyń orynbasary Baǵlanbek Aıtpaev.