Qazaqstanda keıbir aýrýlardyń bolýy júrgizýshi kýáliginiń qoldanylýyn toqtatýǵa negiz bolýy múmkin. Alaıda dıagnozdyń ózi kólik júrgizýge avtomatty túrde tyıym salmaıdy. Medısınalyq qarsy kórsetilimder tizbesi Qazaqstan Respýblıkasy Densaýlyq saqtaý mınıstrliginiń №853 buıryǵymen bekitilgen. Olar týraly málimetter ishki ister organdaryna jiberiledi, al kýáliktiń qoldanylýyn toqtatý týraly túpkilikti sheshimdi sot qabyldaıdy, dep habarlaıdy infohub.kz saıty.
Absolútti qarsy kórsetilimder qataryna keıbir aýyr psıhıkalyq buzylystar, epılepsıa, ahromatopsıa jáne eki kózdiń soqyrlyǵy engizilgen. Tizbege sondaı-aq shızofrenıa, shızotıptik jáne sandyraqtyq buzylystar, aýyr nemese jıi asqynatyn kórinisteri bar jekelegen sozylmaly psıhıkalyq buzylystar, sondaı-aq remısıa merzimi eki jyldan az bolǵan kezde psıhoaktıvti zattardy qoldanýǵa baılanysty buzylystar kirgizilgen.
Keıbir jaǵdaılarda adam arnaıy jabdyqty paıdalanyp nemese belgili bir sharttarda kólik júrgizýdi jalǵastyra alady. Mysaly, aıaq-qol qyzmeti buzylǵanda qolmen basqarylatyn kólikke ruqsat etiledi. Keıbir kórý qabiletiniń buzylystarynda kózildirik nemese kontaktili lınzamen júrgizýge ruqsat beriledi, al estý qabileti buzylǵanda estý apparatyn nemese basqa túzetý quralyn qoldanýǵa jol ashylady.
Talaptar kólik quralynyń sanatyna qaraı ózgeshelenedi. Jeńil jáne júk avtomobılderi, avtobýstar men basqa da sanattar úshin sharttar bólek: máselen, C, CE, D, DE, C1, D1 jáne taǵy basqa sanattarǵa kórý qabiletine qatysty neǵurlym qatań talaptar qoıylǵan. Atap aıtqanda, bir kózdiń soqyrlyǵy mundaı júrgizýshiler úshin qarsy kórsetilim sanalady. Vestıbýlárlyq apparat aýrýlarynda, kórý qabiletiniń aıqyn buzylystarynda, júıke júıesi zaqymdanýynyń keıbir saldarlarynda, estý qabiletiniń buzylystarynda jáne tirek-qımyl apparatynyń máselelerinde jekelegen shekteýler qarastyrylǵan.
Densaýlyq saqtaý mınıstrliginiń dereginshe, 2026 jyldyń basynan beri kólik júrgizý múmkindigine áser etýi múmkin medısınalyq ózgerister 21 myńnan astam júrgizýshiden anyqtalǵan. 13 myńnan astam adamǵa qatysty polıseıler sotqa talap-aryz joldaǵan. Kúshine engen sheshimder boıynsha 7,4 myńǵa jýyq kýáliktiń qoldanylýy toqtatylǵan.
Densaýlyq saqtaý mınıstrliginde tek dıagnozdyń bolýyna baılanysty quqyq avtomatty túrde toqtatylmaıtynyn bólek atap ótti. Densaýlyq jaǵdaıy medısınalyq qarsy kórsetilimder tizbesine kirip, kólik júrgizý qaýipsizdigine áser etýi múmkin bolsa ǵana shekteý qoıýǵa jol beriledi.
Buǵan deıin Kýrsıv Avto Qazaqstanda júrgizýshi kýáligine emtıhandy jekemenshik avtodromdarda tapsyrý usynylǵanyn habarlaǵan.