Mańǵystaý oblysynda qaza tapqan áskerı qyzmetshilerge baılanysty Qazaqstan jalpyulttyq aza tutýǵa belshesinen batty. Eldegi mádenı ómir de toqtap qaldy: uıymdastyrýshylar men ártister osy kúnge josparlanǵan shoý, konsert jáne spektáklderdi jappaı keıinge shegerip jatyr, dep habarlaıdy infohub.kz saıty.
Mýzykanttar, konserttik toptar, galereıalar men jetekshi teatrlar birinen soń biri gаstróldik kestelerindegi ózgerister týraly aıtyp jatyr.
Máselen, 25 qyrkúıekke josparlanǵan, Maıkl Djekson shyǵarmashylyǵyna arnalǵan álemdik trıbút-shoý ótetin Almatydaǵy konsert 28 qyrkúıekke aýystyryldy. Al osyǵan uqsas shoý 26 qyrkúıekte ózgerissiz ótedi.
Sahnada Amre degen esimmen tanymal qazaqstandyq ánshi Ernar Sadırbaev eldegi qaıǵyly jaǵdaıǵa baılanysty óz óner kórsetýin toqtatyp, barlyq konsertin, relızin jáne is-sharasyn 1 qazanǵa deıin keıinge shegergenin málimdedi.
BI Group kompanıasynyń 25 qyrkúıekke Almaty Theatre-te josparlanǵan joba tanystyrylymdary 2 qazanǵa aýystyryldy. Kompanıa buǵan deıin berilgen barlyq tirkeýler kúshinde qalatynyn atap ótti.
Sonymen qatar stendap ártisi ári bloger Azat Marat, ıaǵnı Zee degen atpen keń tanymal jan, Semeıdegi óner kórsetýin 27 qyrkúıekke shegerdi. Zee qaza tapqandardyń barlyq týystary men jaqyndaryna kóńil aıtty.
Shymkentte bul kúni Ne Prosto Orchestra konserti ótýi tıis edi. İs-shara 30 qyrkúıekke aýystyryldy.
Qazaqstan estradasynyń jas ári tanymal ókili Abzal Ýteshov te Astanadaǵy konsertiniń keıinge shegerilgenin habarlady. İs-shara 29 qyrkúıekte ótedi.
Áleýmettik jelilerde qyzý talqy júrip jatyr. Paıdalanýshylar pikirlerde kúzdegi basqa da iri is-sharalardy tolyq toqtatýdy jáne keıinge shegerýdi talap etýde. Atap aıtqanda, Sadraddın men Qaırat Nurtastyń aldaǵy úlken konsertteri talqylanyp jatyr. Ras, ártisterdiń kestesinde kúnder keshirek tur. Sadraddınniń stadıondyq shoýy 26 jáne 27 qyrkúıekte Almatyda, al Nurtastyń mereıtoılyq konserti 27 qyrkúıekte Astanada jáne 4 qazanda Almatyda josparlanǵan.
Jaqyn kúnderi mádenı sharaǵa barýdy josparlaǵan qazaqstandyqtarǵa is-sharalardyń mártebesin aldyn ala tekserý usynylady. Uıymdastyrýshylardyń jańartýlaryn qadaǵalap, ótkizilý kúni ózgermegenin naqtylap otyryńyz.
Eske salaıyq, 24 qyrkúıekte Kaspıde Áskerı-teńiz kúshteri oqý-jaýyngerlik mindetterin oryndap jatqanda, kenetten shyqqan daýyl men ekpindi jelden 17 áskerı qyzmetshi ashyq teńizge aǵyp ketti. Oqıǵa saldarynan 14 adam qaza tapty.
Sarbazdardyń qaza bolýyna baılanysty prezıdent Qasym-Jomart Toqaev 25 qyrkúıekti Qazaqstanda jalpyulttyq aza tutý kúni dep jarıalady.
Buǵan deıin «Kýrsıv» Kaspıde ótken «Hazar qorǵany — 2026» oqýlary kezinde áskerı qyzmetshilerdiń qaza bolýyna qatysty Qorǵanys mınıstrliginiń bes laýazymdy tulǵasy ustalǵanyn jazǵan bolatyn. Kúdiktilerdiń qatarynda Qazaqstan áskerı-teńiz kúshteri bas qolbasshysynyń birinshi orynbasary jáne jeke quramdy túsirý júrgizilgen «Qaısar» kateriniń komandıri bar.