Qazaqstanda bas qarjy ombýdsmany saılandy — ol Marıa Hadjıeva boldy. Ol qosa atqarýshy retinde baǵaly qaǵazdar naryǵyndaǵy qarjy ombýdsmany qyzmetin de atqarady, dep habarlaıdy infohub.kz saıty.
Qarjy naryǵyn retteý jáne damytý agenttiginiń baspasóz qyzmeti habarlaǵandaı, 30 qyrkúıekte qarjy ombýdsmany qyzmeti keńesiniń otyrysynda bas qarjy ombýdsmany jáne bank, mıkroqarjy, saqtandyrý salalary men baǵaly qaǵazdar naryǵyndaǵy ombýdsmandar saılandy.
Bas qarjy ombýdsmany ári baǵaly qaǵazdar naryǵyndaǵy qarjy ombýdsmany bolyp Marıa Jamalqyzy Hadjıeva saılandy. Onyń qarjy naryǵyn retteý men qadaǵalaýda kópjyldyq tájirıbesi bar. Ádilet mınıstrliginde, Ulttyq Bankte jáne qarjylyq qadaǵalaý organdarynda jumys istegen. 2019–2025 jyldary Qarjy naryǵyn retteý jáne damytý agenttigi tóraǵasynyń orynbasary qyzmetin atqarǵan.
Bank salasyndaǵy qarjy ombýdsmany bolyp Rýslan Farhatuly Ibragımov saılandy. Ol zań jáne qarjy bilimine ıe, bank sektoryndaǵy problemalyq qaryzdarmen jumys tájirıbesi bar. 2016 jyldan beri bank ombýdsmany keńsesinde qyzmet etedi.
Mıkroqarjy salasyndaǵy qarjy ombýdsmany bolyp Nazgúl Qarasqyzy Esteýsızova saılandy. Ol joǵary ekonomıkalyq jáne zań bilimine, zań ǵylymdarynyń magıstri dárejesine ıe. Bank sektorynda jumys istegen, Qazaqstannyń kolektorlar ulttyq palatasyn jáne qaryz alýshylardyń quqyqtaryn qorǵaý jónindegi áleýmettik jobany basqarǵan. 2024 jyldyń jeltoqsanynan bastap mıkroqarjy ombýdsmany bolyp keledi.
Saqtandyrý salasyndaǵy qarjy ombýdsmany bolyp Qanat Tólegenuly Alıgýlov saılandy. Ol ekonomıkalyq jáne zań bilimine ıe, shyǵyndardy retteý jáne saqtandyrý tólemderi bólimshelerin basqarý tájirıbesi bar. Saqtandyrý kompanıalarynda jumys istegen, saqtandyrý jaǵdaılaryn retteýdi avtomattandyrýǵa jáne sıfrlyq klıenttik servısterdi damytýǵa qatysqan.
«Biryńǵaı qarjy ombýdsmany qyzmeti 2027 jyldyń 1 qańtarynan bastap jumys isteı bastaıdy. Ol qoldanystaǵy bank, mıkroqarjy jáne saqtandyrý ombýdsmandary ınstıtýttaryn biriktirip, tutynýshylardy qorǵaý tetigin brokerlik qyzmetterge de taratady. Qarjy ombýdsmany qyzmetiniń aldynda qarjylyq qyzmetterdi tutynýshylardyń ótinishterin tıimdi qaraý, qarjylyq ónimder boıynsha týyndaıtyn daýlardy sotqa deıin retteý, sondaı-aq jeke tulǵalar bolyp tabylatyn qaryz alýshylardyń qaryzdaryn olardyń qarjylyq múmkindikterin eskere otyryp retteýge járdemdesý mindetteri tur», — delingen habarlamada.
Atap ótilgendeı, qyzmettiń basym baǵyttary prosesterdi sıfrlandyrý, jeke jáne ujymdyq qaryzdy retteýdi damytý, onyń ishinde Finkelisim.kz ujymdyq qaryzdy retteý platformasyn paıdalaný, sondaı-aq «Qaryzsyz qoǵam» jobasymen ózara is-qımyl jasaý bolady.
Sonymen qatar qyzmettiń mańyzdy baǵyty júıelik problemalar men minez-qulyqtyq qadaǵalaý sýbektileriniń qaıtalanatyn tájirıbelerin anyqtaý úshin kelip túsken jáne qaralǵan ótinishterdi taldaý, sondaı-aq qarjylyq qyzmetterdi tutynýshylardyń quqyqtaryn qorǵaý tetikterin jetildirý jónindegi tıisti usynystardy daıyndaý bolady.
Qarjylyq qyzmetterdi tutynýshylardyń ótinishterin qaraý tegin júzege asyrylady.
Eske salaıyq, 2025 jyldyń qarashasynda Qazaqstanda bankter jáne bank qyzmeti týraly zań jobasy aıasynda biryńǵaı qarjy ombýdsmanyn engizý qarastyrylyp jatqany habarlanǵan bolatyn.