Qazaqstannyń qaıtalama turǵyn úı naryǵynda baǵa ósýin jalǵastyryp keledi: jyl basynan beri baǵa orta eseppen 2%-ǵa qymbattady. Jalǵyz erekshelik — Almaty, munda sharshy metrdiń quny jyl basynan beri 1,4%-ǵa sál tómendegen. Degenmen megapolıs eldegi eń qymbat qala ataǵyn áli de ustap tur: 22 qyrkúıektegi jaǵdaı boıynsha munda qaıtalama naryqtaǵy bir bólmeli páter orta eseppen 26,5 mln teńgege usynylyp otyr, dep habarlaıdy infohub.kz saıty.

Salystyryp kóreıik: Astanada jyl basynan beri turǵyn úı 5,3%-ǵa qymbattaǵan, alaıda «bir bólmeliniń» ortasha baǵasy tómenirek — 23,5 mln teńge. Eń qymbat qalalardyń bestigine Shymkent (18 mln teńge), Qostanaı (16,9 mln teńge) jáne Atyraý (16 mln teńge) da kirdi.

Qaıtalama naryqtaǵy eń qoljetimdi bir bólmeli páterler Qyzylordada — orta eseppen 8,4 mln teńgege. Baǵasy tómen qalalar qatarynda Jezqazǵan (9,5 mln teńge) men Taraz (9,8 mln teńge) bar. Qarapaıym tilmen aıtqanda, Almatydaǵy bir «bir bólmeliniń» ornyna Qyzylordadan úsh páter satyp alýǵa bolady.

2026 jylǵy 22 qyrkúıektegi bir bólmeli páterdiń ortasha baǵasy bylaısha bólindi: Astana — 23,5 mln teńge, Almaty — 26,5 mln teńge, Shymkent — 18,0 mln teńge, Aqtaý — 12,0 mln teńge, Aqtóbe — 13,0 mln teńge, Atyraý — 16,0 mln teńge, Jezqazǵan — 9,5 mln teńge, Qaraǵandy — 13,5 mln teńge, Kókshetaý — 14,6 mln teńge, Qonaev — 15,1 mln teńge, Qostanaı — 16,9 mln teńge, Qyzylorda — 8,4 mln teńge, Pavlodar — 14,0 mln teńge, Petropavl — 13,6 mln teńge, Semeı — 14,0 mln teńge, Taldyqorǵan — 12,5 mln teńge, Taraz — 9,8 mln teńge. Derek kózi — krisha.kz.

Jyl basynan beri baǵa eń kóp kóterilgen qala — Kókshetaý: 8,3%-ǵa ósip, orta eseppen 14,6 mln teńgege jetti. Aıtarlyqtaı ósim Pavlodarda — 7,2%, 14 mln teńgege deıin, jáne Semeıde — 6,2%, orta eseppen 14 mln teńgege deıin baıqaldy.

Aıta ketý kerek, bul — naqty mámile baǵalary emes, páter ıeleri satylym habarlandyrýlarynda kórsetken somalar.

Buǵan deıin Ulttyq statısıka búrosy tirkegen baǵalar týraly habarlanǵan bolatyn. Tamyzda bastapqy naryqta sharshy metr orta eseppen 625 435 teńge, al qaıtalama naryqta 635 185 teńge turdy. Sonymen qatar sarapshylar Qazaqstandaǵy eń qymbat turǵyn úıi bar qalalardyń jeke tizimin jasaǵan, al turǵyn úı jaldaý baǵasynyń ózgeristeri týraly bólek bilýge bolady.