Qazaqstanda esirtki qylmysyna qatysty ister boıynsha 69 kámeletke tolmaǵan jasóspirim ustaldy, dep habarlaıdy infohub.kz saıty. İshki ister mınıstrliginiń málimetinshe, 40 jasóspirim esirtki satqany úshin, 27-si asa iri mólsherde saqtaǵany úshin, taǵy ekeýi tyıym salynǵan zattardy jarnamalap, nasıhattaǵany úshin jaýapqa tartyldy. Ustalǵandardyń arasynda 52 ul jáne 17 qyz bar.
Vedomstvo ata-analar men zańdy ókilderge balalardyń minez-qulqyndaǵy ózgeristerdi muqıat qadaǵalaýdy surap úndeý jasady. İİM Esirtki qylmysyna qarsy is-qımyl komıteti basqarmasynyń bastyǵy Baqytjan Ámirhanov jasóspirimniń esirtkiniń zańsyz aınalymyna tartylǵanyn kórsetýi múmkin belgilerdi atady.
«Sizdi ásirese mynalar alańdatýy tıis: kenetten aqsha nemese qymbat zattardyń paıda bolýy, telefon men hat-habardaǵy jasyryndyq, túrli nysandardyń kúmándi skrınshottary», — dedi Ámirhanov.
Onyń aıtýynsha, jasóspirimnen tabylǵan oramalar, shaǵyn paketter, ızolenta nemese elektrondyq tarazy da jaǵdaıǵa nazar aýdarýǵa sebep bolýy múmkin. İİM ókili ata-analarǵa balanyń bos ýaqytyn qalaı ótkizetinin, messendjerlerde kimmen sóılesetinin jáne áleýmettik jelilerde kimge jazylǵanyn bilip otyrýǵa keńes berdi.
Ámirhanov esirtki qylmysy úshin qylmystyq jaýapkershilik 16 jastan bastalatynyn eske salyp, ata-analardy balalardyń quqyqtyq tárbıesine qatysýǵa shaqyrdy.
Jańa oqý jylynyń basynan beri polıseıler eldegi barlyq derlik mektepter men ózge de oqý oryndarynda 16 myń profılaktıkalyq is-shara ótkizdi. Olardyń 5 myńnan astamy pedagogterdiń, psıhologterdiń jáne narkolog dárigerlerdiń qatysýymen ótti.
Buǵan deıin «Kýrsıv» Qaraǵandyda er adamnyń Taılandtan esirtki jetkizýdi uıymdastyrdy dep kúdikke ilingenin jazǵan bolatyn. Qarjylyq monıtorıń agenttiginiń dereginshe, ol bir sálemdemeni alý úshin tanys jasóspirimdi tartyp, jóneltilimdi onyń atyna rásimdegen.