Qazaqstanda bir ortasha jalaqyǵa shamamen 79 keli irimshik satyp alýǵa bolady — bul Eýrazıalyq ekonomıkalyq odaq (EAEO) elderiniń ishindegi eń tómen kórsetkish. Salystyrsaq: Belarýste sol jalaqyǵa 127 keli, Reseıde 120 keli irimshik alýǵa bolady, dep habarlaıdy infohub.kz saıty.
Buǵan deıin Qazaqstan irimshik óndirisin arttyryp, tipti ónimniń bir bóligin basqa elderge eksporttaıtyny habarlanǵan. Alaıda halyq úshin irimshik ónimderi EAEO-ǵa múshe basqa memleketterge qaraǵanda qymbatyraq bolyp shyqty.
Eýrazıalyq ekonomıkalyq komısıanyń málimetinshe, Qazaqstanda bir ortasha nomınaldy jalaqyǵa 79 keli qatty, jumsaq nemese uıytqy irimshik satyp alýǵa bolady — bul odaqtaǵy eń tómen kórsetkish.
İrimshiktiń qoljetimdiligi boıynsha kósh bastaǵan — Belarýs: munda bir jalaqyǵa 127 keli jetedi. Odan keıin Reseı tur — 120 keli. Armenıada jalaqy 116 keli, al Qyrǵyzstanda 92 keli irimshik ónimin alýǵa múmkindik beredi.
Sút ónimderinde de jaǵdaı uqsas. Bir jalaqyǵa ortasha qazaqstandyq 764 lıtr tutas sút satyp ala alady — bul Qyrǵyzstandaǵydan (511 lıtr) kóp, biraq EAEO-nyń basqa elderinen az.
Mysaly, Belarýste bir jalaqyǵa 1 277 lıtr tutas nemese shıki sút alýǵa bolady, al Reseıde 1 181 lıtr. Armenıada aqsha 848 lıtrge jetedi.
İrimshik qazaqstandyqtar úshin EAEO-nyń basqa elderiniń halqyna qaraǵanda qymbatyraq bolyp shyqqan jalǵyz ónim. Qalǵanynda respýblıka birqatar taýardyń qoljetimdiligi boıynsha kósh bastap tur.
Máselen, el kartoptyń qoljetimdiligi boıynsha erekshelendi: bir ortasha nomınaldy jalaqyǵa 1 737 keli jetedi. Salystyrsaq: kartoppen jıi baılanystyrylatyn Belarýste aqsha 1 492 kelige ǵana jetedi — bul tipti Reseıdegi kórsetkishten (1 565 keli) de az. Odan keıin Qyrǵyzstan (1 133 keli) jáne Armenıa (740 keli) tur.
Sondaı-aq Qazaqstan halyq úshin birinshi sortty bıdaı unynyń, makaronnyń, aq qyryqqabattyń, qyzanaqtyń, sábizdiń jáne pıazdyń qoljetimdiligi boıynsha sózsiz kósh bastady.
Aıta keteıik, irimshikke qatysty uqsas jaǵdaı buǵan deıin de baıqalǵan. Mysaly, byltyr Qazaqstan irimshik ónimderiniń baǵasy boıynsha TMD elderiniń barlyǵy derlik derlik asyp túskeni habarlanǵan. Onda «kóshbasshy» pozısıasyn Moldova ıelengen.